ഭാരത് ജോഡോ യാത്രയുടെ 100 ദിനങ്ങൾ; ജയ്പൂരിൽ സംഗീത കച്ചേരിയോടെ ആഘോഷിക്കാൻ കോൺഗ്രസ്
രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ 100 ദിനങ്ങൾ പ്രമാണിച്ച് കോൺഗ്രസ് വെള്ളിയാഴ്ച ജയ്പൂരിൽ ഗായിക സുനിധി ചൗഹാന്റെ തത്സമയ പ്രകടനത്തോടെ ഒരു സംഗീത കച്ചേരി സംഘടിപ്പിക്കുമെന്ന് എഐസിസി ജനറൽ സെക്രട്ടറി ജയറാം രമേശ് പറഞ്ഞു.
കഴിഞ്ഞ സെപ്റ്റംബർ ഏഴിന് കന്യാകുമാരിയിൽ നിന്ന് ആരംഭിച്ച യാത്ര ഇതുവരെ തമിഴ്‌നാട്, കേരളം, ആന്ധ്രാപ്രദേശ്, കർണാടക, തെലങ്കാന, മഹാരാഷ്ട്ര, മധ്യപ്രദേശ് എന്നീ സംസ്ഥാനങ്ങളിൽ സഞ്ചരിച്ചു. 2023 ഫെബ്രുവരി ആദ്യം ജമ്മു കശ്മീരിൽ സമാപിക്കും.
‘ഭാരത് ജോഡോ കച്ചേരി’യിൽ രാഹുൽ ഗാന്ധി ഉൾപ്പെടെയുള്ള കോൺഗ്രസ് നേതാക്കൾ പങ്കെടുക്കും, അന്നേ ദിവസം ഉച്ചയ്ക്ക് 1 മണിക്ക് ദൗസയിൽ വാർത്താസമ്മേളനത്തെ അഭിസംബോധന ചെയ്യും. ഡിസംബർ 16ന് ഭാരത് ജോഡോ യാത്ര 100 ദിവസം തികയ്ക്കുമെന്നും ഇതൊരു നാഴികക്കല്ലായിരിക്കുമെന്നും രമേശ് വാർത്താ സമ്മേളനത്തിൽ പറഞ്ഞു. ഡിസംബർ 19ന് അൽവാറിൽ വമ്പിച്ച പൊതുയോഗം സംഘടിപ്പിക്കുമെന്നും അദ്ദേഹം കൂട്ടിച്ചേർത്തു.
