ദീപാവലിക്ക് പിന്നാലെ ഡൽഹിയിലെ വായുവിന്റെ ഗുണനിലവാരം മോശമാകുന്നു; മലിനീകരണ നിയന്ത്രണങ്ങൾ തുടരും

മലിനീകരണത്തിനെതിരെ പോരാടാനുള്ള ആം ആദ്മി സർക്കാരിന്റെ നിയന്ത്രണ പദ്ധതി തൽക്കാലം തുടരുമെന്ന് തീരുമാനം. ദീപാവലിക്ക് ഒരു ദിവസത്തിന് ശേഷം ഡൽഹിയിലെ വായുവിന്റെ ഗുണനിലവാരം അപകടകരമായ നിലയിലെത്തി.

കേന്ദ്രത്തിന്റെ വായു മലിനീകരണ നിയന്ത്രണ പദ്ധതിയുടെ നാലാം ഘട്ടത്തിൽ നിർമാണ പ്രവർത്തനങ്ങൾ നിരോധിക്കലും ഡൽഹിയിലേക്കുള്ള ട്രക്കുകളുടെ പ്രവേശനവും ഉൾപ്പെടെയുള്ള കർശന നടപടികൾ ഇനിയൊരു ഉത്തരവുണ്ടാകുന്നതുവരെ ഡൽഹിയിൽ തുടരുമെന്ന് റായ് പറഞ്ഞു.

പൊടി മലിനീകരണം നിയന്ത്രിക്കുന്നതിനുള്ള കാമ്പയിൻ നവംബർ 30 വരെ നീട്ടാൻ ഡൽഹി സർക്കാർ തീരുമാനിച്ചതായി ഗോപാൽ റായ് പറഞ്ഞു. നവംബർ 14 മുതൽ മാലിന്യം തുറന്ന് കത്തിക്കുന്നതിനെതിരെ ഒരു മാസം നീണ്ടുനിൽക്കുന്ന സമരം ആരംഭിക്കുമെന്നും അദ്ദേഹം പറഞ്ഞു.

ബിജെപി അംഗങ്ങൾ പടക്കങ്ങൾ കത്തിക്കാൻ ആളുകളെ പ്രേരിപ്പിച്ചതായി റായ് പറഞ്ഞു. “ബിജെപി അംഗങ്ങൾ പടക്കങ്ങൾ കത്തിക്കാൻ ആളുകളെ പ്രേരിപ്പിച്ചു, ഇത് ഡൽഹിയുടെ വായു ഗുണനിലവാര സൂചികയിൽ (എക്യുഐ) ഒറ്റരാത്രികൊണ്ട് 100 പോയിന്റുകൾ വർധിപ്പിച്ചു,” അദ്ദേഹം പറഞ്ഞു.

ഇന്ന് രാവിലെ മിക്ക തത്സമയ എയർ മോണിറ്ററിംഗ് പ്ലാറ്റ്‌ഫോമുകളും എയർ ക്വാളിറ്റി ഇൻഡക്‌സ് (എക്യുഐ) 500-ന് മുകളിലായി കണക്കാക്കി, ചില സ്ഥലങ്ങളിൽ 900 വരെ ഉയർന്നു. ജവഹർലാൽ നെഹ്‌റു സ്റ്റേഡിയം 910, ലജ്പത് നഗർ 959, കരോൾ ബാഗ് 779 എന്നിങ്ങനെയാണ് രാവിലെ 6 മണിയോടെ രേഖപ്പെടുത്തിയത്. സുപ്രീം കോടതിയുടെ ഉത്തരവ് അവഗണിച്ച് ഇന്നലെ പടക്കം പൊട്ടിക്കുന്നതിനായി പ്രദേശത്തെ പാർക്കുകളിൽ ആളുകൾ തടിച്ചുകൂടിയതിന്റെ സോഷ്യൽ മീഡിയ ദൃശ്യങ്ങൾ കാണിച്ചു.