‘ഓൾ വി ഇമാജിൻ ആസ് ലൈറ്റ്’ ; ശനിയാഴ്ച കേരളത്തിലെ പരിമിത സ്‌ക്രീനുകളിൽ റിലീസ് ചെയ്യുന്നു
77-ാമത് കാൻ ഫിലിം ഫെസ്റ്റിവലിലെ ഗ്രാൻഡ് പ്രിക്സ് അവാർഡ് ജേതാവായ പായൽ കപാഡിയയുടെ “ഓൾ വി ഇമാജിൻ അസ് ലൈറ്റ്”, ശനിയാഴ്ച കേരളത്തിലുടനീളം പരിമിത സ്‌ക്രീനുകളിൽ റിലീസ് ചെയ്യുമെന്ന് നിർമ്മാതാക്കൾ അറിയിച്ചു. ബാഹുബലി താരം റാണ ദഗ്ഗുബതി സ്ഥാപിച്ച പ്രൊഡക്ഷൻ ഹൗസ് സ്പിരിറ്റ് മീഡിയയാണ് മലയാളം-ഹിന്ദി ചിത്രം ഇന്ത്യയിൽ വിതരണം ചെയ്യാനുള്ള അവകാശം നേടിയത്.
മലയാളത്തിൽ “പ്രഭയ് നിനച്ചതെല്ലാം” എന്ന് പേരിട്ടിരിക്കുന്ന ചിത്രം പിന്നീട് ഇന്ത്യയിലെ എല്ലാ പ്രധാന നഗരങ്ങളിലും റിലീസ് ചെയ്യും. “ഓൾ വി ഇമാജിൻ ആസ് ലൈറ്റ്” എന്ന ചിത്രത്തിന് ഗ്രാൻഡ് പ്രിക്സ് അവാർഡ് നേടിയ ചലച്ചിത്ര നിർമ്മാതാവ്, തൻ്റെ സിനിമ ഇന്ത്യയിൽ റിലീസ് ചെയ്തതിൽ സന്തോഷമുണ്ടെന്ന് പറഞ്ഞു.
“മുംബൈയിൽ ജോലി ചെയ്യാനും തങ്ങളുടെ ജീവിതാഭിലാഷങ്ങൾ സാക്ഷാത്കരിക്കാനും കേരളത്തിൽ നിന്ന് വരുന്ന രണ്ട് സ്ത്രീകളാണ് സിനിമയുടെ കാതൽ. അതുകൊണ്ട് ആദ്യം തിയേറ്ററുകളിൽ സിനിമ കാണുന്ന സംസ്ഥാനം കേരളമാണെന്നതാണ് ഉചിതം. ഞങ്ങളുടെ റിലീസ് പുരോഗമിക്കുമ്പോൾ ഇന്ത്യയുടെ എല്ലാ ഭാഗങ്ങളിലും ചിത്രം എത്തുന്നതിൽ ഞാൻ ആവേശത്തിലാണ്, ”സംവിധായകൻ പറഞ്ഞു.
