താനൂരിലെ ബോട്ടപകടത്തില് കാണാതായ എട്ട് വയസുകാരനെ കണ്ടെത്തി
![single-img](https://www.evartha.in/wp-content/themes/nextline_evartha_v2/images/footer_logo.png)
![](https://www.evartha.in/wp-content/uploads/2023/05/n4976217321683535052621ee8d912826190e3385f352296d30dc6aeb7b5ea9306c651a456b6c58097316d8.jpg)
താനൂരിലെ ബോട്ടപകടത്തില് കാണാതായ എട്ട് വയസുകാരനെ കണ്ടെത്തി. അപകടത്തില് പെട്ട് പരിക്കേറ്റ് കോഴിക്കോട് മെഡിക്കല് കോളേജ് ആശുപത്രിയില് ചികിത്സയില് കഴിയുകയാണ് കുട്ടി.
ഇന്നലത്തെ തിരക്കില് ബന്ധുക്കള്ക്ക് കുട്ടിയെ കുറിച്ച് വിവരം ലഭിച്ചിരുന്നില്ല. കുട്ടിയെ കാണാനില്ലെന്ന പരാതിയില് അപകടം നടന്ന സ്ഥലത്ത് തിരച്ചില് നടത്തുന്നതിനിടെയാണ് കുട്ടിയെ കണ്ടെത്തിയത്. ബന്ധുക്കള് തന്നെ ആശുപത്രികളില് ചികിത്സയിലുള്ളവരില് കുട്ടിയുണ്ടോയെന്ന് പൊലീസിനോട് ചോദിച്ചിരുന്നു. തുടര്ന്ന് നടത്തിയ അന്വേഷണത്തിലാണ് കോഴിക്കോട് മെഡിക്കല് കോളജിലേക്ക് കുട്ടിയെ മാറ്റിയിരുന്നുവെന്ന് മനസിലായത്. ഇതോടെ ഇനി അപകടത്തില് പെട്ട ആരെയും കണ്ടുകിട്ടാനില്ലെന്നാണ് കരുതുന്നത്. ആരെയും കണ്ടെത്താനുള്ളതായി ഇപ്പോള് പരാതി വന്നിട്ടില്ല. ഈ സാഹചര്യത്തില് തിരച്ചില് അവസാനിപ്പിച്ചേക്കും.
ഇതോടെ അപകട സമയത്ത് ബോട്ടിലുണ്ടായിരുന്നത് 37 പേരാണെന്ന സംശയം ബലപ്പെട്ടു. അപകടം നടന്നയുടന് ബോട്ടില് നിന്ന് വെള്ളത്തില് ചാടി നീന്തി രക്ഷപ്പെട്ട അഞ്ച് പേരെ നേരത്തെ തന്നെ കണ്ടെത്തിയിരുന്നു. 22 പേരാണ് അപകടത്തില് മരിച്ചത്. കാണാതായെന്ന കരുതിയ കുട്ടിയടക്കം പത്ത് പേരാണ് ചികിത്സയിലുള്ളത്.
മരിച്ച 9 പേര് പരപ്പനങ്ങാടിയിലെ ഒരു കുടുംബത്തിലെ അംഗങ്ങളാണ്. ഈ കുടുംബത്തിന്റെ ബന്ധുക്കളായ രണ്ടു പേരും അപകടത്തില് മരിച്ചു. അപകടത്തില് ജുഡീഷ്യല് അന്വേഷണം പ്രഖ്യാപിച്ച മുഖ്യമന്ത്രി, മരിച്ചവരുടെ കുടുംബങ്ങള്ക്ക് പത്തു ലക്ഷം രൂപ ധനസഹായം പ്രഖ്യാപിച്ചു. യാതൊരു സുരക്ഷാ ചട്ടങ്ങളും പാലിക്കകത്തെ ബോട്ടില് ആളുകളെ കുത്തിനിറച്ചതാണ് അപകട കാരണമായതെന്ന് പ്രദേശവാസികള് ആരോപിച്ചു. ബോട്ടുടമ താനൂര് സ്വദേശി നാസര് ഒളിവിലാണ്. ഇയാള്ക്കെതിരെ നരഹത്യക്ക് കേസെടുത്തു. പരപ്പനങ്ങാടി താനൂര് നഗരസഭാ അതിര്ത്തിയിലെ, പൂരപ്പുഴയില് ഒട്ടുംപുറം തൂവല് തീരത്തിന് സമീപം ഇന്നലെ രാത്രി ഏഴരയ്ക്ക് ആയിരുന്നു ബോട്ടപകടം.