അവസാന ടൂര്ണമെന്റ് ആഘോഷമാക്കി ഏഞ്ചല് ഡി മരിയ; അര്ജന്റീനയുടെ കോപ്പ അമേരിക്ക കിരീടധാരണം
![single-img](https://www.evartha.in/wp-content/themes/nextline_evartha_v2/images/footer_logo.png)
![](https://www.evartha.in/wp-content/uploads/2024/07/copa.jpg)
മത്സരത്തിനിടെ പരിക്കേറ്റ് കണ്ണീരോടെ മടങ്ങിയ ലിയോണല് മെസിക്കും , അവസാന ടൂര്ണമെന്റ് ആഘോഷമാക്കിയ ഏഞ്ചല് ഡി മരിയക്ക് സമ്മാനമായി അര്ജന്റീനയുടെ കോപ്പ അമേരിക്ക 2024 കിരീടധാരണം. ഇരു ടീമും അക്കൗണ്ട് തുറക്കാതിരുന്ന 90 മിനുറ്റുകള്ക്ക് ശേഷമുള്ള എക്സ്ട്രാടൈമില് പകരക്കാരനായി ഇറങ്ങിയ ലൗട്ടാരോ മാര്ട്ടിനസ് (112-ാം മിനുറ്റ്) നേടിയ ഏക ഗോളിലാണ് അര്ജന്റീനയുടെ വിജയം .
അതേസമയം അര്ജന്റീനയുടെ തുടര്ച്ചയായ രണ്ടാം കോപ്പ കിരീടമാണിത്. കളി കാണാനുള്ള ടിക്കറ്റില്ലാതെ എത്തിയ കൊളംബിയന് ആരാധകര് വലിയ സുരക്ഷാ പ്രശ്നമായതോടെ മയാമിയിലെ ഹാര്ഡ് റോക്ക് സ്റ്റേഡിയത്തില് 82 മിനുറ്റ് വൈകിയാണ് അര്ജന്റീന-കൊളംബിയ ഫൈനല് ആരംഭിച്ചത്.
മികച്ച പ്രകടനം നടത്തിയ കൊളംബിയന് പ്രസ്സിന് മുന്നില് വിയര്ക്കുന്ന അര്ജന്റീനയെയാണ് ആദ്യപകുതിയിലുടനീളം കണ്ടത്. കൊളംബിയ അവരുടെ ഫിസിക്കല് ഗെയിം ഫൈനലിലും പുറത്തെടുത്തു. എങ്ങനെയും ഗോളടിക്കാനുള്ള കൊളംബിയന് കുതിപ്പും അപ്രതീക്ഷിത ഷോട്ടുകളും അര്ജന്റീനയ്ക്ക് തലവേദന ഇരട്ടിയാക്കി.
ഇതിനിടെ സാക്ഷാല് ലിയോണല് മെസിക്ക് പോലും ഫിനിഷിംഗ് പിഴച്ചു. അങ്ങിനെ ഗോള്രഹിതമായി മത്സരം ഇടവേളയ്ക്ക് പിരിഞ്ഞു. ഗോളി എമി മാര്ട്ടിനസിന്റെ മികവ് ആദ്യപകുതിയില് അര്ജന്റീനയ്ക്ക് സുരക്ഷയായി മാറി. എന്നാൽ രണ്ടാംപകുതിയുടെ തുടക്കത്തിലെ അര്ജന്റീന ഉണര്വ് വീണ്ടെടുത്തു. 58-ാം മിനുറ്റില് ഏഞ്ചല് ഡി മരിയയുടെ ഷോട്ട് നിര്ഭാഗ്യം കൊണ്ടാണ് ഗോളാകാതെ പോയത്.
ആദ്യപകുതിയിലെ പരിക്ക് രണ്ടാംപകുതിയിലും വലച്ചതോടെ മെസി 66-ാം മിനുറ്റില് നിറകണ്ണുകളോടെ കളത്തിന് പുറത്തേക്ക് മടങ്ങി. ഡഗൗട്ടിലെത്തിയ മെസി പൊട്ടിക്കരയുന്നത് ഫുട്ബോള് ലോകം തത്സമയം കണ്ടു.
90 മിനുറ്റുകള്ക്ക് ശേഷം എക്സ്ട്രാടൈമിന്റെ ആദ്യപകുതിയിലും ഇരു ടീമുകളുടെയും ഗോള്ശ്രമങ്ങള് പാളി. എന്നാല് രണ്ടാംപകുതിയില് ലൗട്ടാരോ മാര്ട്ടിനസിന്റെ സുന്ദര ഫിനിഷിംഗ് അര്ജന്റീനയ്ക്ക് ലീഡും കപ്പും സമ്മാനിച്ചു.