ഇന്നു മുതല്‍ സൗദിയില്‍ അതിശൈത്യമെന്ന് കാലാവസ്ഥ നിരീക്ഷണ വിഭാഗം
9 December 2016
സൗദിയില്‍ ഇന്ന് മുതല്‍ അതിശൈത്യം അനുഭവപ്പെടുമെന്ന് കാലാവസ്ഥാ നിരീക്ഷണ വിഭാഗം അറിയിച്ചു.ജനങ്ങള്‍ക്ക് ജാഗ്രതാ നിര്‍ദ്ദേശം നല്‍കിയിട്ടുണ്ട്. ഞായറാഴ്ച രാവിലെ റിയാദില്‍ കുറഞ്ഞ താപനില അഞ്ചു ഡിഗ്രി സെല്‍ഷ്യസ് വരെയാകുമെന്നും മുന്നറിയിപ്പുണ്ട്.
ഇന്ന് മുതല്‍ സൗദിയുടെ ഉത്തര മധ്യ മേഖലകളില്‍ അതിശൈത്യം അനുഭവപ്പെടുമെന്നാണ് കാലാവസ്ഥ നിരീക്ഷണ വിഭാഗം അറിയിച്ചത്. വടക്കന്‍ അതിര്‍ത്തി പ്രവിശ്യ, തബൂക്ക്, അല്‍ ഖസീം, ഹായില്‍ തുടങ്ങിയ സ്ഥലങ്ങളില്‍ നാളെമുതല്‍ തിങ്കളാഴ്ച വരെ കൊടും തണുപ്പ് അനുഭവപ്പെടും.
അതിശൈത്യത്തിന്റെ സ്വാധീനം കിഴക്കന്‍ പ്രവിശ്യയിലേക്കും റിയാദിലേക്കും മദീനയിലേക്കും വ്യാപിക്കും. റിയാദില്‍ ഏറ്റവും കൂടിയ തണുപ്പ് അനുഭവപ്പെടുക ഞായറാഴ്ച ആയിരിക്കും.
