ഓസ്ട്രേലിയൻ ഓപ്പൺ; ഇന്ത്യയുടെ പി വി സിന്ധു പുറത്ത്

ഓസ്ട്രേലിയൻ ഓപ്പണിൽ ഇന്ത്യയുടെ പി വി സിന്ധു പുറത്ത്. യുഎസിന്റെ ബെയ്‌വന്‍ സാങ്ങിനോടായിരുന്നു പി വി സിന്ധു കീഴടങ്ങിയത്. നേരിട്ടുള്ള ​ഗെയിമുകൾക്കായിരുന്നു സിന്ധുവിൻ്റെ പരാജയം.

മത്സരത്തിലെ ആദ്യ ​ഗെയിമിൽ ബെയ്‌വൻ അനായാസം വിജയിച്ചു. രണ്ടാം ​ഗെയിമിൽ സിന്ധു തിരിച്ചുവരവിന് ശ്രമിച്ചെങ്കിലും നടന്നില്ല. സ്കോർ 13-21, 17-21. കഴിഞ്ഞ മൂന്ന് വർഷത്തിനിടെ ആദ്യമായാണ് സിന്ധുവും ബെയ്വാനും പരസ്പരം ഏറ്റുമുട്ടുന്നത്. ഇതേവരെ 10 തവണ ഇരുവരും ഏറ്റുമു‌ട്ടിയതിൽ ആറിലും ജയം സിന്ധുവിനായിരുന്നു.

എന്നാൽ ഇത്തവണ മത്സരം വെറും 39 മിനിറ്റിൽ അവസാനിച്ചു. രണ്ടാം ​ഗെയിമിൽ 16-16 എന്ന് സ്കോർ സമനിലയിൽ എത്തിച്ചത് മാത്രമായിരുന്നു സിന്ധുവിൻ്റെ നേട്ടം. ആദ്യ റൗണ്ടിൽ അഷ്മിത ചാലിയയെയും പ്രീക്വാർട്ടറിൽ ആകർഷി കശ്യാപിനെയും കീഴടക്കിയായിരുന്നു സിന്ധു ക്വാർട്ടറിലെത്തിയത്. ഈ വർഷത്തെ ഏഴ് ടൂർണമെന്റുകളിൽ സിന്ധു ആദ്യ റൗണ്ടിൽ പരാജയപ്പെട്ടു.