തെറ്റായ വാര്‍ത്തകള്‍ അറിയാതെ പോലും പ്രചരിപ്പിക്കാതിരിക്കാന്‍ ശ്രദ്ധിക്കുമല്ലോ; സോഷ്യൽ മീഡിയ പോസ്റ്റുമായി മമ്മൂട്ടിയും മോഹന്‍ലാലും
വയനാട് ജില്ലയിലെ മുണ്ടക്കൈ ഉരുള്‍പൊട്ടലില്‍ നഷ്ടപ്പെട്ടത്നിരവധി ജീവനുകളാണ്. സുരക്ഷയും ജാഗ്രതയും പാലിക്കാനും തെറ്റായ വാര്‍ത്തകള്‍ പ്രചരിപ്പിക്കാതിരിക്കാനും ശ്രദ്ധ വേണമെന്ന് അറിയിച്ചിരിക്കുകയാണ് നടന്മാരായ മമ്മൂട്ടിയും മോഹന്‍ലാലും.
‘ ശക്തമായ മഴയും പ്രകൃതിക്ഷോഭവും തുടരുന്ന സാഹചര്യത്തില്‍ സുരക്ഷയും ജാഗ്രതയും പാലിക്കാന്‍ ശ്രമിക്കുക. സര്‍ക്കാര്‍ പുറപ്പെടുവിക്കുന്ന നിര്‍ദ്ദേശങ്ങള്‍ പൂര്‍ണ്ണമായും പാലിക്കുകയും യാത്രകള്‍ പരമാവധി ഒഴിവാക്കുകയും ചെയ്യുക. തെറ്റായ വാര്‍ത്തകള്‍ അറിയാതെ പോലും പ്രചരിപ്പിക്കാതിരിക്കാന്‍ ശ്രദ്ധിക്കുമല്ലോ. വയനാട്ടിലെ പ്രിയ സഹോദരങ്ങള്‍ക്കായി പ്രാര്‍ഥനയോടെ…’എന്നാണ് മമ്മൂട്ടിയും മോഹന്‍ലാലും പോസ്റ്റ് ചെയ്തിരിക്കുന്നത്.
ഇവർ ഇരുവർക്കും പുറമേ പൃഥ്വിരാജ്, ഉണ്ണിമുകുന്ദന്‍, ആന്റണി വര്‍ഗീസ് തുടങ്ങി മലയാളത്തിലെ ധാരാളം താരങ്ങള്‍ ജാഗ്രത നിര്‍ദേശങ്ങള്‍ അറിയിച്ചു കൊണ്ട് പോസ്റ്റുകളും മരണപ്പെട്ടവര്‍ക്ക് അനുശോചനവും അറിയിച്ചിട്ടുണ്ട്.
