ഹരിയാനയിൽ ബിജെപി ഹാട്രിക് വിജയം സ്വന്തമാക്കും: പ്രധാനമന്ത്രി

ജമ്മുകശ്മീരിലും ഹരിയാനയിലും നിയമസഭാ തെരഞ്ഞെടുപ്പ് പ്രചാരണത്തിന് തുടക്കം കുറിച്ച് പ്രധാനമന്ത്രി നരേന്ദ്ര മോദി. ഹരിയാനയിൽ ഇത്തവണ ബിജെപി ഹാട്രിക് വിജയം നേടുമെന്ന് ഇന്ന് കുരുക്ഷേത്രയിൽ നടന്ന റാലിയിൽ പ്രധാനമന്ത്രി അവകാശപ്പെട്ടു.

മുൻ കോൺഗ്രസ് സർക്കാരിന്റെ കാലത്തെ അഴിമതി ജനം മറന്നിട്ടില്ല. വ്യാജ പ്രചാരണത്തിലൂടെ വോട്ട് നേടാനാണ് കോൺഗ്രസ് നോക്കുന്നത്. കോൺഗ്രസ് ഭരണത്തിലേറിയ മൂന്ന് സംസ്ഥാനങ്ങളിലും വാഗ്ദാനങ്ങൾ നടപ്പാക്കാത്തതിനെതിരെ ജനവികാരം ശക്തമാണെന്നും മോദി പറഞ്ഞു.

അതേപോലെ തന്നെ, ജമ്മുകശ്മീർ വികസനത്തിന്റെ പാതയിലാണെന്നും സംസ്ഥാനത്ത് ഭീകരവാദം തുടച്ചുനീക്കാനുള്ള നീക്കം അന്തിമ ഘട്ടത്തിലാണെന്നും ദോഡയിൽ നടന്ന റാലിയിൽ നരേന്ദ്ര മോദി അവകാശപ്പെട്ടു.