ചാമ്പ്യൻസ് ട്രോഫി: ഇന്ത്യ പാകിസ്ഥാനിലേക്ക് പോകണമോയെന്ന് കേന്ദ്രസർക്കാർ തീരുമാനിക്കും: ബിസിസിഐ

2025 ചാമ്പ്യൻസ് ട്രോഫിക്കായി ഇന്ത്യൻ ക്രിക്കറ്റ് ടീം പാകിസ്ഥാനിലേക്ക് പോകുമോ എന്ന കാര്യത്തിൽ കേന്ദ്ര സർക്കാർ അന്തിമ തീരുമാനം എടുക്കുമെന്ന് ബിസിസിഐ വൈസ് പ്രസിഡൻറ് രാജീവ് ശുക്ല പറഞ്ഞു. ഫെബ്രുവരി 19 മുതൽ മാർച്ച് 9 വരെ നടക്കുന്ന ഐസിസി ഏകദിന ടൂർണമെൻ്റിന് പാകിസ്ഥാൻ ആതിഥേയത്വം വഹിക്കും.

“ഇതുവരെ തീരുമാനമൊന്നും എടുത്തിട്ടില്ല . പക്ഷേ, രാജ്യാന്തര പര്യടനങ്ങൾക്ക് ഞങ്ങൾ എപ്പോഴും കേന്ദ്ര സർക്കാരിൻ്റെ അനുമതി തേടും എന്നതാണ് ഞങ്ങളുടെ നയം. ഞങ്ങളുടെ ടീം ഏതെങ്കിലും രാജ്യത്തേക്ക് പോകണോ എന്ന് തീരുമാനിക്കേണ്ടത് സർക്കാരാണ്, ”ശുക്ല മാധ്യമപ്രവർത്തകരോട് പറഞ്ഞു.

“ഈ സാഹചര്യത്തിൽ (കൂടാതെ), സർക്കാർ എന്ത് തീരുമാനമെടുത്താലും ഞങ്ങൾ അത് അനുസരിക്കും,” അദ്ദേഹം കൂട്ടിച്ചേർത്തു. ഇന്ത്യ-ബംഗ്ലദേശ് രണ്ടാം ടെസ്റ്റ് മത്സരത്തിനിടെ മാധ്യമങ്ങളോട് സംസാരിക്കുകയായിരുന്നു ശുക്ല.

നിലവിൽ ഇന്ത്യയും പാക്കിസ്ഥാനും ഐസിസിയുടെ ഇവൻറുകളിൽ മാത്രമാണ് പരസ്പരം കളിക്കുന്നത്. 150 ലധികം പേർ കൊല്ലപ്പെട്ട മുംബൈ ഭീകരാക്രമണത്തെ തുടർന്ന് 2008 മുതൽ ഉഭയകക്ഷി ക്രിക്കറ്റിനായി ഇന്ത്യ പാകിസ്ഥാനിലേക്ക് പോയിട്ടില്ല. ഏഴ് വർഷത്തെ ഇടവേളയ്ക്ക് ശേഷം കഴിഞ്ഞ വർഷം ഏകദിന ലോകകപ്പിനായി പാകിസ്ഥാൻ ഇന്ത്യയിലെത്തിയിരുന്നു.