അസമിൽ സംസ്ഥാന ചലച്ചിത്ര അവാർഡ് ജേതാക്കൾക്ക് നൽകിയ ചെക്കുകൾ ബൗൺസ്
അസമിൽ സംസ്ഥാന ചലച്ചിത്ര അവാർഡ് ജേതാക്കൾക്ക് നൽകിയ ചെക്കുകൾ ബൗൺസ് ആയത് സംസ്ഥാന സർക്കാരിനെ നാണം കെടുത്തുന്ന അവസ്ഥയിലായി. തിങ്കളാഴ്ചയാണ് അവാർഡുകൾ വിതരണം ചെയ്തത്. വെള്ളിയാഴ്ച, എട്ട് വിജയികൾക്ക് നൽകിയ ഒമ്പത് ചെക്കുകൾ ക്ലിയറൻസിനായി ഹാജരാക്കിയപ്പോൾ ബാങ്ക് തിരികെ നൽകി.
“ഞാൻ വെള്ളിയാഴ്ച ചെക്ക് നിക്ഷേപിച്ചു, അത് ബൗൺസ് ആയതായി ബാങ്കിൽ നിന്ന് ഒരു കോൾ ലഭിച്ചു. ഉടൻ തന്നെ ഞാൻ സംഘാടകരെ വിളിച്ചു, മതിയായ ബാലൻസ് ഇല്ലെന്ന് പറഞ്ഞു,” അപരാജിത പൂജാരി പിടിഐയോട് പറഞ്ഞു.
2018ലെ സിനിമയിലെ മികച്ച രചനയ്ക്കുള്ള പുരസ്‌കാരം പൂജാരി നേടിയിരുന്നു. അമൃത് പ്രീതം (സൗണ്ട് ഡിസൈൻ), ദേബജിത് ചാങ്‌മൈ (സൗണ്ട് മിക്‌സിംഗ്), പ്രഞ്ജൽ ദേക (സംവിധാനം), ദേബജിത് ഗയാൻ (സൗണ്ട് ഡിസൈനും മിക്‌സിംഗും), ബെഞ്ചമിൻ ഡൈമറി (അഭിനയം) തുടങ്ങിയ പ്രമുഖ സിനിമാ താരങ്ങൾക്കു കൈമാറിയ ചെക്കുകളും ബൗൺസ് ആയതായി വൃത്തങ്ങൾ അറിയിച്ചു.
അസം സ്റ്റേറ്റ് ഫിലിം ഫിനാൻസ് & ഡെവലപ്‌മെന്റ് കോർപ്പറേഷനാണ് (എഎസ്എഫ്എഫ്ഡിസി) സംസ്ഥാന ചലച്ചിത്ര അവാർഡ് ദാന ചടങ്ങ് സംഘടിപ്പിക്കുന്നത്. ചെക്കുകളിൽ കൾച്ചറൽ അഫയേഴ്സ് ഡയറക്ടറാണ് ഒപ്പിട്ടിരിക്കുന്നത്. സംഭവത്തിൽ ഉടൻ അന്വേഷണം നടത്താൻ സാംസ്‌കാരിക മന്ത്രി ബിമൽ ബോറ ഉദ്യോഗസ്ഥരോട് ആവശ്യപ്പെട്ടു.
ശനിയാഴ്ച സംഘാടകർ പൂജാരിയെ വിളിച്ച് ചെക്ക് വീണ്ടും നിക്ഷേപിക്കാൻ ആവശ്യപ്പെട്ടു. ഇത്തവണ അത് ക്ലിയർ ചെയ്യുമെന്ന് അവർ പറഞ്ഞിട്ടുണ്ടെന്നും അവർ പറഞ്ഞു.”സാങ്കേതിക കാരണത്താൽ ചെക്കുകൾ ബൗൺസ് ചെയ്തു. ആദ്യ ദിവസം 18 ലക്ഷം രൂപയുടെ ചെക്കുകൾ ക്ലിയർ ചെയ്തു, എന്നാൽ രണ്ടാം ദിവസം എട്ട് പേരുടെ ഒമ്പത് ചെക്കുകൾ ബൗൺസ് ചെയ്തു.” – ASFFDC യുടെ ഒരു ഉദ്യോഗസ്ഥൻ പറഞ്ഞു. തകരാർ പരിഹരിച്ചതായും എട്ട് പേരെയും ചെക്ക് നിക്ഷേപിക്കാൻ ശനിയാഴ്ച വ്യക്തിപരമായി അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
