അലോപ്പതിക്കെതിരായ പരാമർശങ്ങൾ 3 ദിവസത്തിനുള്ളിൽ സോഷ്യൽ മീഡിയയിൽ നിന്നും നീക്കണം; ബാബാ രാംദേവിന് നിർദേശം നൽകി കോടതി

കോവിഡ് വൈറസ് വ്യാപന കാലഘട്ടത്തിൽ അലോപ്പതിക്കെതിരായി നടത്തിയ ബാബാ രാംദേവിന്റെ പരാമർശങ്ങൾ പിൻവലിക്കണമെന്ന് ഡൽഹി ഹൈക്കോടതി. കോവിഡ് 19 ബാധിച്ച് ലക്ഷക്കണക്കിനു പേർ മരിച്ചതിനു കാരണം അലോപ്പതി മരുന്നുകളാണെന്നും പതഞ്ജലിയുടെ ‘കൊറോണിൽ’ മരുന്നിന് കോവിഡ് ഭേദമാക്കാനാകും എന്നുമുള്ള പരാമർശങ്ങൾ പിൻവലിക്കാനാണ് ജസ്റ്റിസ് അനൂപ് ജയ്റാം ഭാംഭാനി ഉത്തരവിട്ടത്.

തെറ്റായ ഈ പരാമർശങ്ങൾ അടുത്ത 3 ദിവസത്തിനുള്ളിൽ സമൂഹ മാധ്യമങ്ങളിൽനിന്ന് നീക്കണമെന്നും കോടതി ബാബാ രാംദേവിന് നിർദേശം നൽകി. മൂന്നു ദിവസത്തിനുള്ളിൽ രാംദേവ് പരാമർശങ്ങൾ നീക്കിയില്ലെങ്കിൽ സമൂഹമാധ്യമങ്ങൾ സ്വമേധയാ ഇവ നീക്കണമെന്നും കോടതിവിധിയിൽ ചൂണ്ടിക്കാട്ടി .

രാജ്യത്തെ വിവിധ ഡോക്ടർമാരുടെ വിവിധ സംഘടനകൾ 2021ൽ ബാബാ രാംദേവിനും സഹായി ആചാര്യ ബാലകൃഷ്ണയ്ക്കുമെതിരെ നൽകിയ പരാതികളിലാണ് നടപടി. രോഗപ്രതിരോധ ശേഷി വർധിപ്പിക്കാനുള്ള മരുന്നായി മാത്രം ലൈസൻസ് ലഭിച്ച കൊറോണലിനെ കോവിഡിനുള്ള മരുന്നെന്ന് തെറ്റിദ്ധരിപ്പിച്ച് പരസ്യം നൽകിയതിനെതിരെയാണ് സംഘടനകൾ കോടതിയെ സമീപിച്ചത്.

കോവിഡ് ബാധിച്ച് ആളുകൾ മരിച്ചതിന് കാരണം അലോപ്പതി മരുന്നുകളാണെന്ന് ബാബാ രാംദേവ് പ്രസ്താവന നടത്തിയത് ആളുകൾ ആശുപത്രിയിൽ ചികിത്സ തേടാതിരിക്കാൻ കാരണമായെന്നും പരാതിയിൽ ആരോപിക്കുന്നു.