യുവതിയെ തട്ടിക്കൊണ്ട് പോയതായി പരാതി; ഇടുക്കിയിൽ യൂത്ത് കോണ്‍ഗ്രസ് നേതാക്കള്‍ക്കെതിരെ കേസ്
ഇടുക്കി ജില്ലയിലെ തങ്കമണിയില്‍ നിന്നും യുവതിയെ തട്ടിക്കൊണ്ട് പോയതായി പരാതി. സംഭവത്തില്‍ യൂത്ത് കോണ്‍ഗ്രസ് നേതാക്കള്‍ക്കെതിരെ പൊലീസ് കേസെടുത്തു. കൊല്ലം ജില്ലയിലെ പത്തനാപുരം സ്വദേശികളായ അനീഷ് ഖാന്‍, യദുകൃഷ്ണന്‍ എന്നീവര്‍ക്കെതിരെയാണ് കേസ്.
ഇതിൽ, യദുകൃഷ്ണന്‍ പത്തനാപുരം ബ്ലോക്ക് പഞ്ചായത്ത് മെംബറും കെ എസ് യു സംസ്ഥാന വൈസ് പ്രസിഡന്റുമാണ്. അനീഷ് ഖാന്‍ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറിയായി മത്സരിക്കുന്നയാളാണ്. അനീഷ് ഖാന്റെ ബന്ധുവായ മിശ്രവിവാഹിതയായ പെണ്‍കുട്ടിയെയാണ് തട്ടി കൊണ്ടുപോയത്. പത്തനാപുരം സ്വദേശി രഞ്ജിത്ത് ആണ് പെണ്‍കുട്ടിയെ വിവാഹം കഴിച്ചത്.
കഴിഞ്ഞ ശനിയാഴ്ച്ച രാത്രിയാണ് കേസിനാസ്പദമായ സംഭവമുണ്ടായത്. പത്തനംതിട്ട സ്വദേശിയായ രഞ്ജിത്തും പെണ്‍കുട്ടിയും മിശ്രവിവാഹിതരായിരുന്നു. രേഖകള്‍ പ്രകാരം 15നാണ് പത്തനാപുരത്ത് ഒരു അമ്പലത്തില്‍ വെച്ച് വിവാഹം കഴിഞ്ഞത്. മുസ്ലിം വിഭാഗത്തില്‍ നിന്നാണ് പെണ്‍കുട്ടി. വിവാഹത്തിന് ശേഷം ഇടുക്കിയിലുള്ള ഭര്‍ത്താവിന്റെ ബന്ധുവിന്റെ വീട്ടിലേക്കെത്തുകയായിരുന്നു. എന്നാല്‍ ഇന്നലെ പെണ്‍കുട്ടിയെ യൂത്ത് കോണ്‍ഗ്രസ് നേതാവായ ബന്ധുവും സുഹൃത്തുക്കളും ചേര്‍ന്ന് വീട്ടില്‍ അതിക്രമിച്ച് കയറി തട്ടിക്കൊണ്ടു പോയെന്നാണ് പരാതി.
അനീഷ് ഖാന്റെ ബന്ധുവാണ് പെണ്‍കുട്ടി. സഹോദരിയുടെ മകളാണെന്നാണ് വിവരം. ബന്ധുക്കളേയും രഞ്ജിത്തിനേയും കമ്പിവടികൊണ്ട് മര്‍ദ്ദിച്ചവശരാക്കിയാണ് പെണ്‍കുട്ടിയെ തട്ടിക്കൊണ്ടുപോയതെന്ന് പരാതിയില്‍ പറയുന്നു. ആക്രമണത്തില്‍ പരിക്കേറ്റ രഞ്ജിത്തും ബന്ധുക്കളും മെഡിക്കല്‍ കോളേജ് ആശുപത്രിയില്‍ ചികിത്സ തേടിയിരുന്നു.
വീട്ടില്‍ അതിക്രമിച്ച് കയറിയതിനും മര്‍ദ്ദിച്ചതിനുമാണ് കേസ്. നേരത്തെ പെണ്‍കുട്ടിയെ പിടിച്ചുകൊണ്ടു പോവുകയും മജിസ്‌ട്രേറ്റിന് മുന്നില്‍ ഹാജരാക്കുകയും ചെയ്തിരുന്നു. തുടര്‍ന്ന് സ്വന്തം ഇഷ്ടപ്രകാരം രഞ്ജിത്തിന്റെ കൂടെ പോരുകയായിരുന്നു. അവിടെ നിന്നാണ് വീണ്ടും തട്ടിക്കൊണ്ടുപോയതെന്നാണ് രഞ്ജിത്ത് പറയുന്നത്. രഞ്ജിത്ത് ഇതുമായി ബന്ധപ്പെട്ട് സംസാരിക്കുന്ന വീഡിയോയും പുറത്തുവന്നിട്ടുണ്ട്.
