കെ സുരേന്ദ്രന്റെ പോസ്റ്റിൽ ഓണാശംസ നേർന്ന് കോൺഗ്രസ് എംപി ഡീൻ

ബിജെപി സംസ്ഥാന പ്രസിഡന്റ് കെ സുരേന്ദ്രന്റെ ഫേസ്ബുക്ക് പോസ്റ്റിൽ കമന്റായി കോൺ​ഗ്രസ് നേതാവ് ഓണാശംസ എഴുതിയത് സോഷ്യൽ മീഡിയയിൽ ചർച്ചയാകുന്നു. ഇടുക്കി എംപിയായ ഡീൻ കുര്യാക്കോസാണ് കെ സുരേന്ദ്രന് ഓണാശംസകൾ നേർന്നത്.

സംസ്ഥാനത്തെ ഒരു കോൺഗ്രസ് എംപി ബിജെപിയിൽ അംഗമാകുമെന്ന് ഇതിനോടകം പ്രചാരണം ഉണ്ട്. ആ സമയമാണ് ഡീൻ കുര്യാക്കോസിന്റെ ആശംസാ സന്ദേശം. ” ഏവർക്കും എന്റെ ഹൃദയം നിറഞ്ഞ ഓണാശംസകൾ” – എന്നാണ് കെ സുരേന്ദ്രൻ ഫേസ്ബുക്കിൽ കുറിച്ചത്.

ഈ പോസ്റ്റിനു കമന്റായാണ് ഹാപ്പി ഓണം എന്ന് ഇമോജിക്കൊപ്പം ഡീൻ കുറിച്ചത്. ഡീൻ കുര്യാക്കോസിന് നന്ദി പറഞ്ഞ് തിരികെ ആശംസയും സുരേന്ദ്രൻ മറുപടിയായി നൽകി. അതേസമയം, കേരളത്തിൽ നിന്നുള്ള ഒരു കോൺ​ഗ്രസ് എംപി പാർട്ടി മാറാനായി ബിജെപി ദേശീയ നേതൃത്വവുമായി ചർച്ചകൾ നടത്തുന്നു എന്നാണ് ദേശീയ മാധ്യമങ്ങളിൽ ഉൾപ്പെടെ റിപ്പോർട്ടുകൾ പുറത്തുവന്നത്.