അതിർത്തിയിലെ നുഴഞ്ഞുകയറ്റം; കേന്ദ്രസർക്കാരിനെതിരെ കോൺഗ്രസ് അധ്യക്ഷൻ മല്ലികാർജുൻ ഖാർഗെ

അതിർത്തിയിൽ നുഴഞ്ഞുകയറ്റത്തിൽ ഏർപ്പെടുന്ന ചൈനയെ നേരിടാൻ കഴിയാതെ ബിജെപി സർക്കാർ രാജ്യത്തിന് പുറത്ത് സിംഹത്തെപ്പോലെയാണ് സംസാരിക്കുന്നതെന്നും എന്നാൽ ഉള്ളിൽ എലിയെപ്പോലെയാണ് പെരുമാറുന്നതെന്നും കോൺഗ്രസ് അധ്യക്ഷൻ മല്ലികാർജുൻ ഖാർഗെ ആരോപിച്ചു.

ഭാരത് ജോഡോ യാത്രയ്ക്കിടെ രാജസ്ഥാനിലെ അൽവാറിൽ നടന്ന റാലിയിൽ സംസാരിക്കവെ, കോൺഗ്രസ് രാജ്യത്തിന് വേണ്ടി നിലകൊള്ളുകയും അതിന്റെ നേതാക്കൾ അത്യധികം ത്യാഗങ്ങൾ സഹിച്ച് സ്വാതന്ത്ര്യം നേടുകയും ചെയ്തപ്പോൾ രാജ്യത്തിന് വേണ്ടി “ബിജെപിയുടെ ഒരു നായ പോലും നഷ്ടപ്പെട്ടിട്ടില്ല” എന്നും അദ്ദേഹം അവകാശപ്പെട്ടു.

ബിജെപി രാജ്യത്തെ ജനങ്ങളെ മതത്തിന്റെയും ജാതിയുടെയും പ്രദേശത്തിന്റെയും അടിസ്ഥാനത്തിൽ ഭിന്നിപ്പിക്കുകയാണെന്നും ജനാധിപത്യവും ഭരണഘടനാ സ്ഥാപനങ്ങളുടെ സ്വയംഭരണവും അവസാനിപ്പിക്കുകയാണെന്നുംഅദ്ദേഹം ആരോപിച്ചു, ഇതിനെതിരെയാണ് കോൺഗ്രസ് ഭാരത് ജോഡോ യാത്ര നടത്തുന്നത്.

“തങ്ങൾ വളരെ ശക്തരാണെന്ന് മോദി സർക്കാർ അവകാശപ്പെടുന്നു, ആർക്കും അവരുടെ കണ്ണുകളിലേക്ക് നോക്കാൻ കഴിയില്ലെന്ന് അവകാശപ്പെടുന്നു, എന്നാൽ അതിർത്തിയിൽ തർക്കങ്ങളും സംഘർഷങ്ങളും ഉയരുകയാണ്. ഗാൽവാനിലെ അതിർത്തിയിൽ നമ്മുടെ 20 സൈനികർ വീരമൃത്യു വരിച്ചതിന് ശേഷം മോദി ജി ചൈനീസ് പ്രസിഡന്റുമായി കൂടിക്കാഴ്ച നടത്തി. 18 തവണ, അവർ മീറ്റിംഗുകൾ നടത്തി, ഊഞ്ഞാലാട്ടം പോലും നടത്തി. ഇതൊക്കെയാണെങ്കിലും, ചൈനയുമായുള്ള അതിർത്തിയിൽ എന്തുകൊണ്ടാണ് ഇത് സംഭവിക്കുന്നത്? “- അദ്ദേഹംചോദിച്ചു.

ചൈനയുടെ വിഷയം താൻ വീണ്ടും പാർലമെന്റിൽ ഉന്നയിച്ചെന്നും അതിർത്തിയിലെ സ്ഥിതി ചർച്ച ചെയ്യണമെന്നും എന്നാൽ ബിജെപി സർക്കാർ അതിന് തയ്യാറല്ലെന്നും ഖാർഗെ പറഞ്ഞു. ” പുറത്ത് സിംഹത്തെപ്പോലെയാണ് അവർ സംസാരിക്കുന്നത്, എന്നാൽ നേരിൽ കണ്ടാൽ എലിയെപ്പോലെയാണ് അവരുടെ പ്രവൃത്തികൾ. വിഷയം ചർച്ച ചെയ്ത് നോട്ടീസ് നൽകണമെന്നാണ് ഞങ്ങളുടെ ആവശ്യം, എന്നാൽ അവർ ഇപ്പോഴും പാർലമെന്റിൽ ചർച്ചയ്ക്ക് തയ്യാറായിട്ടില്ല”- അദ്ദേഹം പറഞ്ഞു.