ഇഡി സുതാര്യമായും വിശ്വസനീയമായും പ്രവര്‍ത്തിക്കണം; പ്രതികാര ബുദ്ധിയോടെ പെരുമാറരുത്: സുപ്രീംകോടതി
കേന്ദ്ര ഏജൻസിയായ എന്‍ഫോഴ്സ്മെന്റ് ഡയറക്ടറേറ്റിനെതിരെ രൂക്ഷവിമര്‍ശനവുമായി സുപ്രീംകോടതി പറഞ്ഞു. ഇഡി സുതാര്യമായും വിശ്വസനീയമായും പ്രവര്‍ത്തിക്കണമെന്ന് സുപ്രീംകോടതി. ഇഡി പ്രതികാര ബുദ്ധിയോടെ പെരുമാറരുതെന്നും സുപ്രീംകോടതി നിര്‍ദേശം നല്‍കി.
കള്ളപ്പണം വെളുപ്പിക്കല്‍ കേസില്‍ അറസ്റ്റിലായ റിയല്‍ എസ്റ്റേറ്റ് ഗ്രൂപ്പായ എം 3 എമ്മിന്റെ ഡയറക്ടര്‍മാര്‍ നല്‍കിയ ഹര്‍ജി പരിഗണിക്കവെയാണ് വിമര്‍ശനം. കള്ളപ്പണം വെളുപ്പിക്കലുമായി ബന്ധപ്പെട്ട കേസില്‍ ജൂണ്‍ 14 ന് എം3എം ഡയറക്ടര്‍മാരായ ബസന്ത് ബന്‍സാലിനേയും പങ്കജിനേയും ചോദ്യം ചെയ്യാന്‍ വിളിപ്പിച്ചിരുന്നു. അതേ ദിവസം തന്നെ ഇഡി രജിസ്റ്റര്‍ ചെയ്ത മറ്റൊരു കേസില്‍ ഇരുവരെയും അറസ്റ്റ് ചെയ്യുകയായിരുന്നു.
തുടര്‍ന്ന് കള്ളപ്പണം വെളുപ്പിക്കല്‍ നിരോധന നിയമത്തിന്റെ (പിഎംഎല്‍എ) സെക്ഷന്‍ 19 പ്രകാരം തങ്ങളെ അറസ്റ്റ് ചെയ്തത് നിയമവിരുദ്ധമാണെന്ന ആരോപണം ഉന്നയിക്കുകയും അറസ്റ്റ് റദ്ദാക്കാന്‍ വിസമ്മതിച്ച പഞ്ചാബ്, ഹരിയാന ഹൈക്കോടതിയുടെ ഉത്തരവിനെതിരെ സുപ്രീംകോടതിയെ സമീപിക്കുകയുമായിരുന്നു.
ഇതിന്റെ അടിസ്ഥാനത്തില്‍ നടത്തിയ അന്വേഷണത്തില്‍ ഇരുവരുടേയും അറസ്റ്റിന്റെ കാരണം വ്യക്തമാക്കുന്ന രേഖാമൂലമുള്ള പകര്‍പ്പ് നല്‍കിയിരുന്നില്ല. ഇത് ഇഡിയുടെ പ്രവര്‍ത്തന ശൈലിയെ മോശമായി പ്രതിഫലിപ്പിക്കുന്ന ഒന്നാണെന്ന് ബെഞ്ച് നിരീക്ഷിച്ചു.ഇത്തരം ഉയര്‍ന്ന അധികാരങ്ങളും പ്രവര്‍ത്തനങ്ങളും ഏല്‍പ്പിച്ചിരിക്കുന്ന ഒരു ഏജന്‍സി സുതാര്യമായിരിക്കണം. നീതിയുടെ മാനദണ്ഡങ്ങള്‍ പാലിക്കണം. പ്രതികാരബുദ്ധിയോടെ പെരുമാറരുതെന്നും നിരീക്ഷിച്ചു.
