പ്രധാനമന്ത്രി ഉദ്ഘാടനം ചെയ്യുന്ന ചടങ്ങിൽ നിന്നും ഒഴിവാക്കി; പ്രതിഷേധവുമായി രാജസ്ഥാൻ മുഖ്യമന്ത്രി ഗെലോട്ട്

വികസന പ്രവർത്തനങ്ങൾ ഉദ്ഘാടനം ചെയ്യുന്നതിൽ നിന്ന് മാറ്റി നിർത്തി സംസ്ഥാനങ്ങളുടെ അവകാശങ്ങൾ ലംഘിക്കാൻ കേന്ദ്രത്തിന് അധികാരമില്ലെന്ന് രാജസ്ഥാൻ മുഖ്യമന്ത്രി അശോക് ഗെലോട്ട് അടുത്തിടെ സിക്കാർ ജില്ലയിൽ പ്രധാനമന്ത്രി നരേന്ദ്ര മോദി വിവിധ വികസന പ്രവർത്തനങ്ങൾ ഉദ്ഘാടനം ചെയ്തതിനെ പരാമർശിച്ച്, പരിപാടിയിലേക്ക് തന്നെ ക്ഷണിച്ചില്ലെന്ന് ഗെലോട്ട് ആരോപിച്ചു.

മുഖ്യമന്ത്രിയുടെ പേര് (പരിപാടിയിൽ പങ്കെടുക്കാൻ) ആദ്യം എഴുതിയിരുന്നെങ്കിലും പിന്നീട് നീക്കം ചെയ്തു. സംസ്ഥാനങ്ങളുടെ അവകാശങ്ങൾ ലംഘിക്കാൻ പ്രധാനമന്ത്രിക്കോ കേന്ദ്ര സർക്കാരിനോ അവകാശമില്ല. ഇതു സംബന്ധിച്ച് ഞാൻ പ്രധാനമന്ത്രിക്ക് കത്തെഴുത്തുമെന്നും തന്റെ വസതിയിൽ ഉദ്യോഗസ്ഥരോട് നടത്തിയ പ്രസംഗത്തിനിടെ ഗെലോട്ട് പറഞ്ഞു.

കേന്ദ്രസർക്കാർ അനുമതി നൽകാത്തതിനെ തുടർന്ന് രാജ്സമന്ദ്, ജലോർ, പ്രതാപ്ഗഡ് എന്നീ മൂന്ന് ജില്ലകളിൽ സംസ്ഥാന സർക്കാർ സ്വന്തം നിലയിൽ മെഡിക്കൽ കോളേജുകൾ സ്ഥാപിക്കുമെന്നും അദ്ദേഹം പറഞ്ഞു. ഇതൊക്കെയാണെങ്കിലും, പ്രധാനമന്ത്രി രാജസ്ഥാനിൽ വരുമ്പോൾ ഞങ്ങൾ അദ്ദേഹത്തെ സ്വാഗതം ചെയ്യുന്നു. എന്നാൽ (ഇത്തവണ) അദ്ദേഹത്തെ സ്വാഗതം ചെയ്യാൻ പ്രധാനമന്ത്രി ഞങ്ങൾക്ക് അവസരം നൽകിയില്ല.

നിങ്ങൾ ഞങ്ങളുടെ നാട്ടിലേക്ക് വരുന്നു, പരിപാടി തുടങ്ങുന്നു, എന്തെങ്കിലും ഉദ്ഘാടനം ചെയ്യുന്നു, ഒരു കാരണവശാലും നിങ്ങൾ ആ പരിപാടിയിൽ രാജസ്ഥാൻ മുഖ്യമന്ത്രിയെ ഉൾപ്പെടുത്താത്തത് ആശ്ചര്യകരമാണ്, ”ഗെലോട്ട് പറഞ്ഞു.

എവിടെയാണ് തെറ്റ് സംഭവിച്ചതെന്നും പരിപാടിയിൽ സംസാരിക്കേണ്ടവരുടെ പട്ടികയിൽ നിന്ന് തന്റെ പേര് നീക്കം ചെയ്തതിന് ഉത്തരവാദി ആരാണെന്നും പ്രധാനമന്ത്രി അന്വേഷിക്കണമെന്നും അദ്ദേഹം പറഞ്ഞു.