വയനാട് ദുരിതാശ്വാസത്തിന്റെ പേരില്‍ പിരിച്ച ഫണ്ട് വകമാറ്റി; അന്വേഷണവുമായി യൂത്ത് കോണ്‍ഗ്രസ്
16 August 2024
വയനാട് ഉരുൾപൊട്ടൽ ദുരിതാശ്വാസത്തിന്റെ പേരില്‍ പിരിച്ച ഫണ്ട് വകമാറ്റി എന്ന പരാതിയില്‍ അന്വേഷണവുമായി യൂത്ത് കോണ്‍ഗ്രസ് സംസ്ഥാന നേതൃത്വം. വിഷയത്തിൽ പരാതി ലഭിച്ചതായും കുറ്റക്കാര്‍ക്കെതിരെ ശക്തമായ നടപടി സ്വീകരിക്കുമെന്നും കോഴിക്കോട് ഡിസിസി നേതൃത്വം അറിയിച്ചു .
കോഴിക്കോട് ജില്ലയിലെ ചേളന്നൂര്‍ മണ്ഡലം വൈസ് പ്രസിഡന്‍റിനെതിരായി ലഭിച്ച പരാതിയില്‍ യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് അബിന്‍ വര്‍ക്കിയുടെ നേതൃത്വത്തില്‍ നേതാക്കളില്‍ നിന്നും മൊഴിയെടുത്തു.
യൂത്ത് കോണ്‍ഗ്രസ് ചേളന്നൂര്‍ മണ്ഡലം വൈസ് പ്രസിഡന്റ് അശ്വിന്‍, പ്രവര്‍ത്തകനായ അനസ് എന്നിവര്‍ വയനാട് ദുരിതാശ്വാസത്തിന്റെ പേരില്‍ പിരിവെടുത്ത ശേഷം ഈ തുക വകമാറ്റിയെന്നായിരുന്നു പരാതി.
