മലപ്പുറത്ത് ഇഡിയുടെ വ്യാപക റെയ്‌ഡ്‌; സ്വർണ്ണക്കള്ളക്കടത്തു കേസിൽ ഉൾപ്പെട്ട ജൂവലറി ഉടമയുടെ വീട്ടിൽ നിന്നും സ്വർണ്ണം പിടികൂടി
കേരളത്തിൽ ഏറെ രാഷ്ട്രീയ വിവാദമായി മാറിയ സ്വർണ്ണക്കടത്തുകേസിൽ സ്വർണത്തിന്റെ പ്രധാന ഗുണഭോക്താവെന്ന് ആരോപിക്കപ്പെടുന്ന മലപ്പുറം ആസ്ഥാനമായുള്ള ജ്വല്ലറി ഹൗസ് പ്രൊമോട്ടറുമായി ബന്ധപ്പെട്ട ‘രഹസ്യ അറയിൽ’ നിന്ന് എൻഫോഴ്‌സ്‌മെന്റ് ഡയറക്ടറേറ്റ് 2.51 കോടി രൂപ വിലമതിക്കുന്ന 5 കിലോ സ്വർണവും 3 ലക്ഷത്തിലധികം രൂപയും പിടിച്ചെടുത്തു .
ദേശീയ മാധ്യമമായ ഹിന്ദുസ്ഥാൻ ടൈംസ് റിപ്പോർട്ട് ചെയ്യുന്നത് പ്രകാരം, മലപ്പുറത്തെ മലബാർ ജ്വല്ലറി ആന്റ് ഫൈൻ ഗോൾഡ് ജ്വല്ലറിയുടെ പ്രമോട്ടർ അബൂബക്കർ പഴേടത്തിന്റേതുൾപ്പെടെ നാല് സ്ഥലങ്ങളിലും അറ്റ്‌ലസ് ഗോൾഡ് സൂപ്പർ മാർക്കറ്റ്‌സ് പ്രൈവറ്റ് ലിമിറ്റഡിന്റെ കോഴിക്കോട് പരിസരത്തും ഏജൻസി നടത്തിയ പരിശോധനയിലാണ് ഇവ പിടികൂടിയത്.
2020 ജൂലൈ 5 ന് തിരുവനന്തപുരം വിമാനത്താവളത്തിലെ യുഎഇ കോൺസുലേറ്റിന്റെ നയതന്ത്ര ബാഗേജിൽ നിന്ന് 15 കോടി രൂപയുടെ സ്വർണം പിടിച്ചെടുത്തുവെന്നാരോപിച്ചുള്ള കേരളത്തിലെ സ്വർണക്കടത്ത് കേസ് ഇഡിക്ക് പുറമെ ദേശീയ അന്വേഷണ ഏജൻസിയും (എൻഐഎ) കസ്റ്റംസ് വകുപ്പും അന്വേഷിക്കുന്നുണ്ട് .
അബൂബക്കർ പഴേടത്ത് ഇതുവരെ റെയ്ഡുകളെ കുറിച്ചും ഏജൻസിയുടെ ആരോപണങ്ങളെ കുറിച്ചും അഭിപ്രായം പറഞ്ഞിട്ടില്ലെന്നും റിപ്പോർട്ടിൽ പറയുന്നു. മുതിര്ന്ന ഐഎഎസ് ഉദ്യോഗസ്ഥൻ എം ശിവശങ്കറിന്റെ നേതൃത്വത്തിൽ സരിത് പിഎസ്, സ്വപ്ന സുരേഷ്, സന്ദീപ് നായർ എന്നിവർ നേതൃത്വം നൽകുന്ന സ്വർണക്കടത്ത് സംഘത്തിന്റെ ഗുണഭോക്താക്കളിൽ ഒരാൾ ആണ് മലപ്പുറത്തെ അബൂബക്കർ പഴേടത്ത് എന്ന് ഇഡി പ്രസ്താവനയിൽ പറഞ്ഞു.
