കനത്ത മഴ; ദുരിതമനുഭവിക്കുന്നവർക്ക് സൗജന്യ എൽപിജിയും റേഷനും നൽകാനൊരുങ്ങി ഹിമാചൽ പ്രദേശ് സർക്കാർ

ഹിമാചൽ പ്രദേശിലെ കനത്ത മഴയിൽ ദുരിതമനുഭവിക്കുന്നവർക്ക് സൗജന്യ എൽപിജിയും റേഷനും നൽകുമെന്ന് മുഖ്യമന്ത്രി സുഖ്‌വീന്ദർ സിംഗ് സുഖു അറിയിച്ചു. സൗജന്യ റേഷൻ വിതരണം 2024 മാർച്ച് 31 വരെ നീട്ടുമെന്നും കുടുംബങ്ങൾക്ക് അടിസ്ഥാന ഭക്ഷണ സാധനങ്ങൾ ലഭ്യമാണെന്ന് ഉറപ്പാക്കുമെന്നും പ്രസ്താവനയിൽ പറഞ്ഞു.

സംസ്ഥാനത്ത് മഴക്കെടുതിയിൽ ദുരിതമനുഭവിക്കുന്ന കുടുംബങ്ങൾക്ക് എൽപിജി സിലിണ്ടറുകളും റേഷനും അടങ്ങിയ ഗ്യാസ് കണക്ഷൻ കിറ്റുകൾ സൗജന്യമായി നൽകുമെന്ന് സുഖു പറഞ്ഞു. ദുരന്തബാധിത കുടുംബങ്ങൾക്ക് സാമ്പത്തിക ബാധ്യതയില്ലാതെ അവശ്യ പാചക സൗകര്യങ്ങൾ ലഭ്യമാക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം പറഞ്ഞു.

കിറ്റുകളിൽ എൽപിജി സിലിണ്ടർ, പ്രഷർ റെഗുലേറ്റർ, ഹോട്ട് പ്ലേറ്റ് എന്നിവ ഉൾപ്പെടുന്നുവെന്ന് പ്രസ്താവനയിൽ പറയുന്നു. ദുരിതബാധിതരായ കുടുംബങ്ങളെ ദുരിതാശ്വാസ ക്യാമ്പുകളിൽ നിന്ന് കൂടുതൽ അനുയോജ്യമായ വാടക വീടുകളിലേക്ക് മാറ്റുന്നതിനും ഗ്രാമ-നഗര പ്രദേശങ്ങൾക്ക് 5,000, 10,000 രൂപ ധനസഹായം നൽകുന്നതിനും സർക്കാർ ശ്രമങ്ങൾ ആരംഭിച്ചതായി അദ്ദേഹം അറിയിച്ചു.