13,000 ഹെൽമെറ്റുകൾ വാങ്ങാനുള്ള പദ്ധതിയുമായി ഇന്ത്യൻ സൈന്യം; എതിർപ്പുമായി സിഖ് സമൂഹം
രാജ്യത്തെ സിഖ് സൈനികർക്കായി 13,000 ഹെൽമെറ്റുകൾ വാങ്ങാൻ ഇന്ത്യൻ സൈന്യം പദ്ധതിയിടുന്നുവെന്ന റിപ്പോർട്ടുകൾക്കെതിരെ സിഖ് സമൂഹം. അകൽ തഖ്തും ശിരോമണി ഗുരുദ്വാര പർബന്ധക് കമ്മിറ്റിയും (എസ്‌ജിപിസി) ഇന്ത്യൻ സൈന്യത്തിന്റെ നിർദ്ദേശത്തിനെതിരെ പ്രതിഷേധിക്കുകയും തീരുമാനം പിൻവലിക്കാൻ കേന്ദ്ര സർക്കാരിനോട് ആവശ്യപ്പെടുകയും ചെയ്തു.
എസ്‌ജിപിസി അധ്യക്ഷൻ ഹർജീന്ദർ സിംഗ് ധാമി കേന്ദ്ര പ്രതിരോധ മന്ത്രി രാജ്‌നാഥ് സിംഗിന് കത്തയച്ചു. “ഹെൽമെറ്റ് വയ്ക്കാനുള്ള ഏതൊരു ശ്രമവും നമ്മുടെ ഐഡന്റിറ്റി അവസാനിപ്പിക്കാനുള്ള ശ്രമമായിരിക്കും, ഒരിക്കലും അത് സഹിക്കില്ല,” അകാൽ തഖ്ത് ജതേദാർ ഗിയാനി ഹർപ്രീത് സിംഗ് ഒരു വീഡിയോ സന്ദേശത്തിൽ പറഞ്ഞു.
അതേസമയം, അടിയന്തര സംഭരണ നടപടിക്രമങ്ങൾ പ്രകാരം 12,730 ഹെൽമെറ്റുകൾ വാങ്ങാൻ പ്രതിരോധ മന്ത്രാലയം നിർദ്ദേശം (ആർഎഫ്പി) പുറപ്പെടുവിക്കുകയായിരുന്നു. രൂപകൽപ്പനയിലും നിർമ്മാണത്തിലും തദ്ദേശീയമായ 8,911 വലുതും 3,819 അധിക വലിയ ഹെൽമെറ്റുകളും വാങ്ങാനാണ് നിർദ്ദേശം. സൈനിക ഓപ്പറേഷൻ സമയത്ത്, സിഖ് സൈനികർ തലയുടെ ഒരു ഭാഗം മറയ്ക്കുന്ന “ബുള്ളറ്റ് പ്രൂഫ് പട്കകൾ” ധരിച്ചിരുന്നു. തല മുഴുവൻ മറയ്ക്കാൻ ബാലിസ്റ്റിക് ഹെൽമെറ്റുകൾ ഉപയോഗിക്കുമെന്ന് വൃത്തങ്ങൾ അറിയിച്ചു.
