ഞാൻ പിൻവാതിലിലൂടെ പോകുന്ന ദൃശ്യങ്ങൾ പുറത്തുവിട്ടാൽ തിരഞ്ഞെടുപ്പ് പ്രചരണം അവസാനിപ്പിക്കും: രാഹുൽ മാങ്കൂട്ടത്തിൽ
കോൺഗ്രസ് പാർട്ടിയിലെ വനിതാ നേതാക്കളടക്കം തങ്ങിയ ഹോട്ടലിൽ പോലീസ് രാത്രി റെയ്ഡ് നടത്തിയതുമായി ബന്ധപ്പെട്ട് സംസ്ഥാനത്ത് വിവാദങ്ങളും പ്രതിഷേധങ്ങളും ശക്തമാകുകയാണ്. നീല പെട്ടിയിൽ ചെന്നെത്തിനിൽക്കുന്ന വിവാദത്തിൽ വെല്ലുവിളിച്ച് പാലക്കാട് കോൺഗ്രസ് സ്ഥാനാർത്ഥി രാഹുൽ മാങ്കൂട്ടത്തിൽ രംഗത്തെത്തി .
ഹോട്ടലിൽ റെയ്ഡ് നടക്കുമ്പോൾ താൻ പിറകുവശത്തുകൂടി ഓടി രക്ഷപ്പെട്ടെന്ന ആരോപണം തെളിയിക്കണമെന്ന് അദ്ദേഹം ആവശ്യപ്പെട്ടു. താൻ ഓടി രക്ഷപ്പെടുന്ന സി.സി.ടി.വി. ദൃശ്യങ്ങൾ പുറത്തുവിടണം. പിൻവാതിലിലൂടെ പോകുന്ന ദൃശ്യങ്ങൾ പുറത്തുവിട്ടാൽ തിരഞ്ഞെടുപ്പ് പ്രചരണം അവസാനിപ്പിക്കുമെന്നും അദ്ദേഹം വെല്ലുവിളിച്ചു.
താനും ഷാഫി പറമ്പിലും അങ്ങോട്ടുമിങ്ങോട്ടും വസ്ത്രം മാറിയിടാറുണ്ടെന്നും തങ്ങളൊക്കെ അങ്ങനെയുള്ള ബന്ധമുണ്ടെന്നും രാഹുൽ വാർത്താസമ്മേളനത്തിൽ പറഞ്ഞു. തിരഞ്ഞെടുപ്പ് നടക്കാനുള്ള തീയതി നീട്ടിയതിനാൽ പിടിച്ചുനിൽക്കാനാണ് എതിർ പാർട്ടിക്കാർ ഇത്തരത്തിലുള്ള ആരോപണങ്ങള്‍ ഉന്നയിക്കുന്നത്. അവർക്കെല്ലാം പിടിച്ചുനിൽക്കണ്ടേ. അല്ലെങ്കിൽപ്പിന്നെ കത്തുവിവാദം ഒന്നുകൂടിയെടുക്കണമെന്നും രാഹുൽ പരിഹസിച്ചു.
