ഇന്ത്യയുടെ രണ്ടാമത്തെ ആണവ അന്തർവാഹിനി; ഐഎൻഎസ് അരിഘട്ട് കമ്മീഷൻ ചെയ്തു
ഇന്ത്യയുടെ രണ്ടാമത്തെ ആണവ അന്തർവാഹിനി ഐഎൻഎസ് അരിഘട്ട് ഇന്ന് വിശാഖപട്ടണത്ത് കമ്മീഷൻ ചെയ്തു. അരിഹന്ത് ക്ലാസ് അന്തർവാഹിനി ഇന്ത്യയുടെ ആണവ ത്രയത്തെ ശക്തിപ്പെടുത്തുകയും ആണവ പ്രതിരോധം വർദ്ധിപ്പിക്കുകയും മേഖലയിൽ തന്ത്രപരമായ സന്തുലിതാവസ്ഥയും സമാധാനവും സ്ഥാപിക്കാൻ സഹായിക്കുകയും രാജ്യത്തിൻ്റെ സുരക്ഷയിൽ നിർണായക പങ്ക് വഹിക്കുകയും ചെയ്യുമെന്ന് പ്രതിരോധ മന്ത്രാലയം പ്രസ്താവനയിൽ പറഞ്ഞു.
ആണവ മിസൈൽ കമ്മീഷൻ ചെയ്യുന്ന ചടങ്ങിൽ പങ്കെടുത്ത പ്രതിരോധ മന്ത്രി രാജ്‌നാഥ് സിംഗ്, നാവിക നാഴികക്കല്ല് രാജ്യത്തിൻ്റെ നേട്ടമാണെന്നും പ്രതിരോധത്തിൽ ആത്മനിർഭർത (സ്വയംപര്യാപ്തത) കൈവരിക്കാനുള്ള പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സർക്കാരിൻ്റെ അചഞ്ചലമായ ദൃഢനിശ്ചയത്തിൻ്റെ തെളിവാണെന്നും വിശേഷിപ്പിച്ചു.
ഐഎൻഎസ് അരിഘട്ടിൻ്റെ നിർമ്മാണത്തിൽ നൂതന രൂപകല്പനയും നിർമ്മാണ സാങ്കേതികവിദ്യയും, വിശദമായ ഗവേഷണവും വികസനവും, പ്രത്യേക സാമഗ്രികളുടെ ഉപയോഗം, സങ്കീർണ്ണമായ എഞ്ചിനീയറിംഗ്, ഉയർന്ന വൈദഗ്ധ്യമുള്ള വർക്ക്മാൻഷിപ്പ് എന്നിവ ഉൾപ്പെടുന്നുവെന്ന് പ്രതിരോധ മന്ത്രാലയം അറിയിച്ചു.
