ഒളിംപിക്സ് വനിതാ ഫുട്‍ബോളിൽ ജപ്പാന്റെ അട്ടിമറി; ബ്രസീലിന് പരാജയം
പാരിസ് ഒളിമ്പിക്സ് 2024 ൽ വനിതാ ഫുട്‍ബോളിൽ അട്ടിമറി വിജയവുമായി ജപ്പാൻ വനിതകൾ. കരുത്തരായ ബ്രസീലിനെ ഇഞ്ചുറി ടൈമിൽ നേടിയ രണ്ട് ഗോളുകളുടെ കരുത്തിലായിരുന്നു ജപ്പാൻ പരാജയപ്പെടുത്തിയത് . നിലവിൽ ഗ്രൂപ്പ് സിയിൽ രണ്ട് മത്സരങ്ങൾ പൂർത്തിയാകുമ്പോൾ മൂന്ന് പോയിന്റുകളുമായി ജപ്പാനും ബ്രസീലും മൂന്നും നാലും സ്ഥാനങ്ങളിലാണ്.
കളിയുടെ 56ാം മിനിറ്റിൽ ജെനിഫെറിലൂടെ ബ്രസീലാണ് ആദ്യം മുന്നിലെത്തിയത്. പക്ഷെ , കളി തീരാൻ മിനിറ്റുകൾ മാത്രം ശേഷിക്കെ നേടിയ രണ്ട് ഗോളുകളിലൂടെ ജപ്പാൻ ബ്രസീലിനെ അട്ടിമറിക്കുകയായിരുന്നു. രണ്ടാം പകുതിയുടെ ഇഞ്ചുറി ടൈമിന്റെ രണ്ടാം മിനിറ്റിൽ കുമഗായി സാകി പെനാൽറ്റിയിലൂടെയാണ് ജപ്പാന്റെ സമനില ഗോൾ നേടിയത്.
പെനാൽറ്റിയിലൂടെ ഗോൾ വന്ന പിന്നാലെ തന്നെ ജപ്പാൻ രണ്ടാമതും ബ്രസീൽ പോസ്റ്റിൽ നിറയൊഴിച്ചു. തനികാവ മൊമോക്കോയുടെ വകയായിരുന്നു ഇഞ്ചുറി ടൈമിന്റെ ആറാം മിനിറ്റിലെ ഗോൾ.
