രാജ്യത്തെ ഏറ്റവും അഴിമതി നിറഞ്ഞ സർക്കാരാണ് കർണാടക സർക്കാർ: രാഹുൽ ഗാന്ധി

കർണാടകയിൽ ബിജെപി നേതൃത്വം നൽകുന്ന സംസ്ഥാന സർക്കാരിനെ രാജ്യത്തെ ഏറ്റവും അഴിമതി നിറഞ്ഞ സർക്കാർ എന്ന് വിശേഷിപ്പിച്ചുകൊണ്ട് കോൺഗ്രസ് നേതാവ് രാഹുൽ ഗാന്ധി. പ്രധാനമന്ത്രിക്ക് കമ്മീഷനുമായി ബന്ധപ്പെട്ട് കരാറുകാർ പരാതികൾ അയച്ചെങ്കിലും നടപടിയൊന്നും ഉണ്ടായിട്ടില്ലെന്നും അദ്ദേഹം പറഞ്ഞു.

“രാജ്യത്തെ ഏറ്റവും അഴിമതി നിറഞ്ഞ സർക്കാരാണിത്. 40 ശതമാനം കമ്മീഷനാണ് ഈ ബിജെപി സർക്കാർ വാങ്ങുന്നത്. ഈ കമ്മീഷനെ കുറിച്ച് കർണാടകയിലെ കരാറുകാർ പ്രധാനമന്ത്രിക്ക് കത്ത് നൽകിയെങ്കിലും നടപടിയോ പ്രതികരണമോ ഉണ്ടായിട്ടില്ല”- അദ്ദേഹം ആരോപിച്ചു.

അതേസമയം, രാഹുൽ ഗാന്ധിയുടെ ഭാരത് ജോഡോ യാത്ര പ്രസിദ്ധമായ 10 ദിവസത്തെ ദസറ ആഘോഷങ്ങൾക്കായി അലങ്കരിച്ച പഴയ മൈസൂരു നഗരത്തിന്റെ തെരുവുകളിലൂടെ ഇന്ന് നടന്ന് മാണ്ഡ്യയിലെത്തി. മൈസൂരിൽ, താളമേളങ്ങൾക്കിടയിൽ വർണ്ണാഭമായ ഘോഷയാത്രയായി യാത്ര നീങ്ങി.

22 കിലോമീറ്റർ ദൂരം പിന്നിട്ട്, വഴിയിൽ ആവേശത്തോടെയുള്ള അനുയായികൾക്കൊപ്പം ഹസ്തദാനം ചെയ്യുകയും ചിത്രങ്ങൾ എടുക്കുകയും ചെയ്ത ശേഷം മാണ്ഡ്യയിലെ പാണ്ഡവപുര ബസ് സ്റ്റേഷനിൽ ഒരു പൊതു സമ്മേളനത്തെ അഭിസംബോധന ചെയ്ത രാഹുൽ ഗാന്ധി, അവിടെ കർണാടകയിലെ ബിജെപി സർക്കാരിനെതിരെ രൂക്ഷ വിമർശനം നടത്തുകയായിരുന്നു.

ബി.ജെ.പി പ്രവർത്തകരെപ്പോലും വെറുതെവിടുന്നില്ലെന്നും കമ്മീഷൻ നൽകാനാവാതെ ബി.ജെ.പി നേതാവായിരുന്ന ഒരു കരാറുകാരന്റെ ആത്മഹത്യയാണ് ഏറ്റവും പുതിയ ഉദാഹരണമെന്നും കോൺഗ്രസ് അദ്ദേഹം പറഞ്ഞു. രാജ്യത്ത് ബിജെപി നടത്തുന്ന” വെറുപ്പിന്റെയും അക്രമത്തിന്റെയും രാഷ്ട്രീയത്തിനെതിരെ ഭാരത് ജോഡോ യാത്രയിൽ ചേരാൻ രാഹുൽ ജനങ്ങളോട് അഭ്യർത്ഥിച്ചു. മൈസൂരിലെത്തിയ കോൺഗ്രസ് അധ്യക്ഷ സോണിയ ഗാന്ധിയും വ്യാഴാഴ്ച യാത്രയിൽ പങ്കെടുക്കും.