ഉരുൾപൊട്ടൽ മുൻകൂട്ടി തിരിച്ചറിയാം; ആപ്പ് നിർമ്മിക്കാൻ കേരള സർവകലാശാല
ഉരുൾപൊട്ടാനുള്ള മുൻകൂട്ടി തിരിച്ചറിയാൻ ആപ്പ് നിർമിച്ച് കേരള സർവകലാശാല. പ്രദേശത്തെ മണ്ണിന്റെ കട്ടിയും പ്രദേശത്തിന്റെ നിരപ്പും അളന്ന് എത്രത്തോളം മഴ പെയ്താലാണ് ഒരു പ്രദേശത്ത് ഉരുൾപൊട്ടൽ ഉണ്ടാകുന്നതെന്ന് മനസിലാക്കാൻ സഹായിക്കുന്ന ആപ്പാണ് നിർമിക്കാനൊരുങ്ങുന്നത്.
സ്ലിപ്പ്കെ (SlipK) എന്ന് പേര് നൽകിയിട്ടുള്ള ആപ്പിന്റെ രൂപമാതൃകാ റിപ്പോർട്ട് സർവകലാശാലാ അധികൃതർ മന്ത്രിയ്ക്ക് സമർപ്പിച്ചു. ഭൗമശാസ്ത്ര ഗവേഷകനും കേരള സർവകലാശാലയിലെ അസിസ്റ്റന്റ് പ്രൊഫസറുമായ ഡോ. കെ എസ് സജിൻകുമാറിന്റെ നിർദ്ദേശത്താലാണ് ആപ്പ് നിർമിക്കാൻ തീരുമാനിക്കുന്നത്.
നേരത്തെ ഉണ്ടായിട്ടുള്ള ഉരുൾപൊട്ടലുകൾ വിലയിരുത്തി എത്രത്തോളം മഴ പെയ്താലാണ് ഉരുൾപൊട്ടലുണ്ടാകുന്നത് എന്ന് വിലയിരുത്തും. പിന്നാലെ സാധ്യത കാണുന്ന പ്രദേശങ്ങളിലെ മഴയുടെ അളവ് കണക്കാക്കുകയും ഇതിലൂടെ ഉരുൾപൊട്ടൽ സാധ്യത വിലയിരുത്തുകയും ചെയ്യും. ഒരു മീറ്റർ കനവും ഇരുപതു ഡിഗ്രി ചെരിവുമുള്ള പ്രദേശത്ത് രണ്ടു ദിവസം കൊണ്ട് നൂറു മിലിമീറ്റർ മഴപെയ്‌താൽ അത് ഉരുൾപ്പൊട്ടലിനു പ്രകോപനമാകും.
അത്തരത്തിലുള്ള മേഖലകളിലെ മഴ ഉരുൾപൊട്ടൽ സാധ്യതെയുള്ള മഴയുടെ നാലിലൊന്നാകുമ്പോൾ ആപ്പ് യെല്ലോ അലർട്ട് നൽകും, തുടർന്ന് മഴയുടെ അളവ് കൂടുന്നതിനനുസരിച്ച് ഓറഞ്ച് അലർട്ടും റെഡ് അലർട്ടും നൽകും. എന്നാൽ മുന്നറിയിപ്പ് നൽകുന്ന സാഹചര്യങ്ങളിലെല്ലാം ഉരുൾപൊട്ടൽ ഉണ്ടാകണമെന്ന് നിർബന്ധമില്ല. പക്ഷെ മഴയുടെ അളവിനനുസരിച്ച് മുന്നറിയിപ്പുകൾ നൽകാനാകും എന്നതാണ് പ്രത്യേകത.
