50% സർക്കാർ കമ്മീഷൻ പരാമർശം; പ്രിയങ്കയുടെ ട്വിറ്റർ കൈകാര്യം ചെയ്യുന്നവർക്കെതിരെ മധ്യപ്രദേശ്പൊലീസ് കേസെടുത്തു
മധ്യപ്രദേശിലെ ബി.ജെ.പി സർക്കാരിനെതിരെ വിമർശനവുമായി സോഷ്യൽ മീഡിയയിൽ പോസ്റ്റിട്ടതിന് മുതിർന്ന കോൺഗ്രസ് നേതാക്കളായ പ്രിയങ്ക ഗാന്ധി, കോൺഗ്രസ് അധ്യക്ഷൻ കമൽനാഥ്, മുൻ കേന്ദ്രമന്ത്രി അരുൺ യാദവ് എന്നിവരുടെ എക്‌സ് (ട്വിറ്റർ) അക്കൗണ്ടുകൾ കൈകാര്യം ചെയ്യുന്നവർക്കെതിരെ ഇൻഡോർ പോലീസ് എഫ്‌ഐആർ രജിസ്റ്റർ ചെയ്തു.
സംസ്ഥാനത്തെ ബിജെപി സർക്കാരിന്റെ അഴിമതി പരാമർശിക്കുന്ന പോസ്റ്റിന്റെ പേരിലാണ് നടപടി. 50 ശതമാനം കമ്മീഷൻ നൽകിയാൽ മാത്രമേ ശമ്പളം ലഭിക്കൂ എന്ന് മധ്യപ്രദേശിൽ നിന്നുള്ള കോൺട്രാക്ടർമാരുടെ യൂണിയൻ ഹൈക്കോടതി ചീഫ് ജസ്റ്റിസിന് കത്തയച്ചെന്ന പ്രിയങ്കയുടെ പോസ്റ്റിനെതിരെ ബിജെപി പരാതി നൽകിയിരുന്നു.
ഗ്യാനേന്ദ്ര അവസ്തി എന്ന വ്യക്തിയുടെ പേരിൽ വ്യാജ കത്ത് സോഷ്യൽ മീഡിയയിൽ പ്രചരിപ്പിച്ചുവെന്ന ബിജെപി പ്രാദേശിക ലീഗൽ സെൽ കൺവീനർ നിമേഷ് പതക്കിന്റെ പരാതിയിൽ കേസെടുത്തതായി ഇൻഡോർ പോലീസ് ട്വീറ്റ് ചെയ്തു.
അവസ്തിക്കും കോൺഗ്രസ് നേതാക്കളുടെ എക്‌സ് അക്കൗണ്ടുകൾ കൈകാര്യം ചെയ്യുന്നവർക്കും എതിരെ സന്യോഗിത്ഗഞ്ച് പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്. ഇന്ത്യൻ ശിക്ഷാ നിയമത്തിലെ സെക്ഷൻ 420 (വഞ്ചന), 469 (പരിക്കുണ്ടാക്കുക എന്ന ഉദ്ദേശത്തോടെയുള്ള വ്യാജരേഖകൾ) എന്നിവ പ്രകാരമാണ് കേസെടുത്തിരിക്കുന്നതെന്ന് അഡീഷണൽ ഡെപ്യൂട്ടി കമ്മീഷണർ റംസനേഹി മിശ്ര പറഞ്ഞു.
ഇതുമായി ബന്ധപ്പെട്ട ട്വിറ്റർ അക്കൗണ്ടുകളുടെ ആധികാരികത പോലീസ് പരിശോധിച്ചുവരികയാണെന്ന് അധികൃതർ അറിയിച്ചു. ബിജെപി ഭരണം അഴിമതിയിലാണെന്ന് പറഞ്ഞ് തെറ്റിദ്ധരിപ്പിക്കുന്ന പോസ്റ്റുകൾ ഷെയർ ചെയ്ത് സംസ്ഥാന സർക്കാരിന്റെയും പാർട്ടിയുടെയും പ്രതിച്ഛായ തകർക്കാൻ കോൺഗ്രസ് നേതാക്കൾ ഗൂഢാലോചന നടത്തുകയാണെന്ന് പഥക്കിന്റെ പരാതിയിൽ പറയുന്നു.
അതേസമയം, മധ്യപ്രദേശ് സർക്കാർ 50 ശതമാനം കമ്മീഷൻ സർക്കാരാണെന്ന് ആരോപിച്ച് വെള്ളിയാഴ്ച പ്രിയങ്ക ഗാന്ധി ട്വീറ്റ് ചെയ്തു കമ്മീഷൻ നൽകിയതിന് ശേഷം മാത്രമാണ് തങ്ങൾക്ക് പണം നൽകുന്നതെന്ന് മധ്യപ്രദേശിൽ നിന്നുള്ള കരാറുകാരുടെ ഒരു യൂണിയൻ ഹൈക്കോടതി ചീഫ് ജസ്റ്റിസിന് കത്തയച്ചു.
അഴിമതിയിൽ മുങ്ങിയ കർണാടകയിലെ ബിജെപി സർക്കാർ 40% കമ്മീഷൻ പിരിച്ചെടുക്കുകയായിരുന്നു. അഴിമതിയുടെ കാര്യത്തിൽ സ്വന്തം റെക്കോഡ് തകർക്കുകയാണ് മധ്യപ്രദേശിലെ ബിജെപി. 40% കമ്മീഷൻ സർക്കാരിനെ കർണാടകയിലെ ജനങ്ങൾ തള്ളിക്കളഞ്ഞു. ഇപ്പോൾ മധ്യപ്രദേശിലെ 50% കമ്മീഷൻ സർക്കാരിനെ അധികാരത്തിൽ നിന്ന് പുറത്താക്കും,” പ്രിയങ്ക ട്വീറ്റ് ചെയ്തു. പിന്നീട് കമൽനാഥും അരുൺ യാദവും ഇതേ പോസ്റ്റ് ഷെയർ ചെയ്തു.
