ട്രക്ക് ക്യാബിനുകൾക്ക് എയർ കണ്ടീഷൻ നിർബന്ധം; കരട് വിജ്ഞാപനത്തിന് കേന്ദ്ര സർക്കാർ അംഗീകാരം
ട്രക്കുകളുടെ ക്യാബിനുകളിൽ എയർ കണ്ടീഷനിംഗ് സംവിധാനം നിർബന്ധമാക്കുന്നതിനുള്ള കരട് വിജ്ഞാപനം അംഗീകരിച്ചതായി കേന്ദ്രമന്ത്രി നിതിൻ ഗഡ്കരി പറഞ്ഞു. തയ്യാറാക്കിയ ഡ്രാഫ്റ്റിൽ എൻ2, എൻ3 വിഭാഗങ്ങൾക്ക് കീഴിലുള്ള ട്രക്കുകൾ ഉൾപ്പെടുന്നുവെന്ന് കേന്ദ്രമന്ത്രി നിതിൻ ഗഡ്കരി ട്വീറ്റ് ചെയ്തു.
“N2, N3 വിഭാഗങ്ങളിൽ പെട്ട ട്രക്കുകളുടെ ക്യാബിനുകളിൽ എയർ കണ്ടീഷനിംഗ് സംവിധാനങ്ങൾ സ്ഥാപിക്കുന്നത് നിർബന്ധമാക്കുന്നതിനുള്ള കരട് വിജ്ഞാപനത്തിന് അംഗീകാരം നൽകി. റോഡ് സുരക്ഷ ഉറപ്പാക്കുന്നതിൽ ട്രക്ക് ഡ്രൈവർമാർ നിർണായക പങ്ക് വഹിക്കുന്നു, ”കേന്ദ്ര റോഡ്, ഗതാഗത, ഹൈവേ മന്ത്രി പറഞ്ഞു.
ട്രക്ക് ഡ്രൈവർമാർക്ക് സുഖപ്രദമായ തൊഴിൽ സാഹചര്യങ്ങൾ പ്രദാനം ചെയ്യുന്നതിലും അതുവഴി അവരുടെ കാര്യക്ഷമത മെച്ചപ്പെടുത്തുന്നതിലും ഡ്രൈവർമാരുടെ ക്ഷീണം പരിഹരിക്കുന്നതിലും ഈ തീരുമാനം ഒരു സുപ്രധാന നാഴികക്കല്ലാണ്, ഗഡ്കരി പറഞ്ഞു.
രാജ്യത്തെ ഏറ്റവും പ്രധാനപ്പെട്ട മേഖലകളിലൊന്നായ ഗതാഗത മേഖലയിൽ ട്രക്ക് ഡ്രൈവർമാർ ഒരു പ്രധാന പങ്ക് വഹിക്കുന്നുണ്ടെന്നും അവരുടെ തൊഴിൽ സാഹചര്യങ്ങളും മാനസികാവസ്ഥയും സംബന്ധിച്ച പ്രശ്‌നങ്ങൾ പരിഹരിക്കേണ്ടതുണ്ടെന്നും കഴിഞ്ഞ മാസം മന്ത്രി പറഞ്ഞിരുന്നു.
കടുത്ത ചൂടിൽ ട്രക്ക് ഡ്രൈവർമാർ ജോലി ചെയ്യാൻ നിർബന്ധിതരായെന്ന് വിലപിച്ച മന്ത്രി, “ചിലർ ചിലവ് വർദ്ധിപ്പിക്കുമെന്ന് പറഞ്ഞ് എതിർത്തപ്പോഴും” ട്രക്ക് ഡ്രൈവർമാർക്കായി എയർ കണ്ടീഷൻഡ് ക്യാബിനുകൾക്കായി താൻ വളരെക്കാലമായി പ്രേരിപ്പിക്കുകയാണെന്നും പറയുകയുണ്ടായി.
