സിബിഐയ്ക്ക് സ്വാഗതം; സിബിഐ നാളെ തന്റെ ബാങ്ക് ലോക്കർ റെയ്ഡ് ചെയ്യുമെന്ന് മനീഷ് സിസോദിയ
ഡൽഹിയിൽ പുതിയ എക്സൈസ് നയം നടപ്പാക്കിയതിലെ അഴിമതിയെക്കുറിച്ച് നടത്തുന്ന അന്വേഷണവുമായി ബന്ധപ്പെട്ട് സിബിഐ നാളെ തന്റെ ബാങ്ക് ലോക്കർ റെയ്ഡ് ചെയ്യുമെന്ന് ഡൽഹി ഉപമുഖ്യമന്ത്രി മനീഷ് സിസോദിയ അവകാശപ്പെട്ടു.
“ഞങ്ങളുടെ ബാങ്ക് ലോക്കർ റെയ്ഡ് ചെയ്യാൻ നാളെ സിബിഐ വരുന്നു. ഓഗസ്റ്റ് 19 ന് എന്റെ വീട്ടിൽ 14 മണിക്കൂർ നടത്തിയ റെയ്ഡിൽ ഒന്നും കണ്ടെത്തിയില്ല. ലോക്കറിലും ഒന്നും കണ്ടെത്താനായില്ല. സിബിഐക്ക് സ്വാഗതം. ഞാനും എന്റെ കുടുംബവും. അന്വേഷണത്തിൽ പൂർണമായി സഹകരിക്കും.”- സിസോദിയ ഇന്ന് ട്വീറ്റ് ചെയ്തു.
അതേസമയം, കേസിൽ സിബിഐ സമർപ്പിച്ച എഫ്‌ഐആറിൽ ആം ആദ്മി പാർട്ടി (എഎപി) നേതാവടക്കം 15 പേരുണ്ട്. എക്സൈസ് ഉദ്യോഗസ്ഥർ, മദ്യക്കമ്പനി മേധാവികൾ, ഡീലർമാർ, അജ്ഞാതരായ ചില പൊതുപ്രവർത്തകർ, സ്വകാര്യ വ്യക്തികൾ എന്നിവർക്കെതിരെയാണ് കേസെടുത്തിരിക്കുന്നത്.
ആം ആദ്മിയിൽ നിന്നും പുറത്തുപോകാനും ബിജെപിയിൽ ചേരാനും ഡൽഹിയിലെ ഭരണകക്ഷിയെ തകർക്കാനും സമ്മർദം ചെലുത്താനാണ് റെയ്ഡ് നടത്തിയതെന്ന് നേരത്തെ തന്നെ സിസോദിയ ആരോപിച്ചിരുന്നു. സംസ്ഥാനത്തെ എക്സൈസ് നയത്തിലെ ക്രമക്കേടുകളുടെ എല്ലാ ആരോപണങ്ങളും നിരസിച്ച സിസോദിയ, ഇത് പൂർണ്ണ സുതാര്യതയോടെയാണ് നടപ്പാക്കിയതെന്ന് പറഞ്ഞു.
“ഈ ആളുകൾക്ക് അഴിമതിയെക്കുറിച്ച് ആശങ്കയില്ല. അവരുടെ ആശങ്ക ജനങ്ങളാൽ സ്നേഹിക്കപ്പെടുകയും ദേശീയ ഓപ്ഷനായി ഉയർന്നുവന്ന അരവിന്ദ് കെജ്രിവാളാണ്” അദ്ദേഹം പറഞ്ഞു.
