മന്ത്രി മുഹമ്മദ് റിയാസിന്റെ ചിത്രം മോർഫ് ചെയ്ത് സ്ത്രീകൾക്കൊപ്പം ചേർത്തു പ്രചരിപ്പിച്ചു; കേസെടുത്ത് സൈബർ പൊലീസ്

മന്ത്രി പി.എ.മുഹമ്മദ് റിയാസിനെ അപകീർത്തിപ്പെടുത്തുന്ന രീതിയിൽ അദ്ദേഹത്തിന്റെ ഫോട്ടോ മോർഫ് ചെയ്ത് സ്ത്രീകൾക്കൊപ്പം ചേർത്തു സോഷ്യൽ മീഡിയയിൽ പ്രചരിപ്പിച്ചതിന് സൈബർ ക്രൈം പൊലീസ് കേസെടുത്തു.

ഒരു യുവതിയുടെ പേരിലുള്ള ഫെയ്സ്ബുക് പേജിലായിരുന്നു ചിത്രം പ്രചരിപ്പിച്ചത്. പോലീസ് നടത്തിയ പ്രാഥമിക പരിശോധനയിൽ ചിത്രങ്ങൾ കൂട്ടിച്ചേർത്തവയാണെന്നു കണ്ടെത്തി . സൈബർ പൊലീസിന്റെ നേതൃത്വത്തിൽ സോഷ്യൽ മീഡിയ നിരീക്ഷിക്കുന്ന വിഭാഗം സ്വമേധയാ കേസെടുക്കുകയായിരുന്നു.
ഫേസ്ബുക്ക് പേജിന്റെ ഐപി വിലാസത്തിലുള്ള ആൾക്കെതിരെ ബിഎൻഎസ് 336(4) വകുപ്പ് പ്രകാരമാണ് കേസ്. പ്രതിക്കായി അന്വേഷണം ആരംഭിച്ചിട്ടുണ്ട്.