ഒരു ചൈനീസ് കളിപ്പാട്ട നിർമ്മാതാക്കൾക്കും ഗുണനിലവാരം ഉറപ്പുവരുത്തുന്ന ബിഐഎസ് ലൈസൻസില്ല: കേന്ദ്ര സർക്കാർ

ഏകദേശം 160 ചൈനീസ് കളിപ്പാട്ട നിർമ്മാതാക്കൾ കഴിഞ്ഞ രണ്ട് വർഷത്തിനുള്ളിൽ ബിഐഎസ് സർട്ടിഫിക്കേഷൻ മാർക്ക് ഐഎസ്ഐക്കായി ബ്യൂറോ ഓഫ് ഇന്ത്യൻ സ്റ്റാൻഡേർഡ്സിനെ സമീപിച്ചെങ്കിലും അവർക്കൊന്നും ബിഐഎസ് ലൈസൻസ് നൽകിയിട്ടില്ലെന്ന് ബിഐഎസ് ഡയറക്ടർ ജനറൽ പ്രമോദ് കുമാർ പറഞ്ഞു.

ഏകദേശം 1000 കളിപ്പാട്ട നിർമ്മാതാക്കൾക്ക് ഇന്ത്യയിൽ ബിഐഎസ് ലൈസൻസ് ഉണ്ടെന്നും അതിൽ 982 ആഭ്യന്തര നിർമ്മാതാക്കളും 29 വിദേശ കമ്പനികളുമാണെന്നും അദ്ദേഹം പറഞ്ഞു. ഇന്ത്യയിലെ വിദേശ കളിപ്പാട്ട നിർമ്മാതാക്കളിൽ പരമാവധി 14 പേർ വിയറ്റ്നാമിൽ നിന്നുള്ളവരാണെന്നും അദ്ദേഹം പറഞ്ഞു. ബിഐഎസിന്റെ 76-ാമത് സ്ഥാപക ദിനത്തോടനുബന്ധിച്ച് സംഘടിപ്പിച്ച വാർത്താ സമ്മേളനത്തിൽ ഒരു ചോദ്യത്തിന് മറുപടിയായി ആണ് ഇക്കാര്യങ്ങൾ ബിഐഎസ് ഡയറക്ടർ ജനറൽ പ്രമോദ് കുമാർ പറഞ്ഞത്.

2020-ൽ, വാണിജ്യ വ്യവസായ മന്ത്രാലയം ടോയ്‌സ് (ഗുണനിലവാര നിയന്ത്രണം) ഓർഡർ, 2020 പുറപ്പെടുവിച്ചിരുന്നു, ഈ നിയമം 2021 ജനുവരി 1 മുതൽ പ്രാബല്യത്തിൽ വരുകയും ചെയ്തു. ഈ ഉത്തരവ് പ്രകാരം, ഇന്ത്യയിലെ എല്ലാ കളിപ്പാട്ട നിർമ്മാതാക്കളും ബിഐഎസ് ലൈസൻസ് എടുക്കേണ്ടതുണ്ട്‌.