സിപിഎമ്മിൽ നിന്നും മുഖ്യമന്ത്രിയിൽ നിന്നും എന്നെ അകറ്റാമെന്ന് ആരും കിനാവ് കാണേണ്ട: പിവി അൻവർ

സിപിഎമ്മിനെ തകർക്കാനും ഇടതു ജനാധിപത്യ മുന്നണിയിൽ വിള്ളലുണ്ടാക്കാനും കമ്യൂണിസ്റ്റ് വിരോധികൾക്ക് വ്യാമോഹം വേണ്ട എന്ന് നിലമ്പൂർ എം എൽ എ പി.വി.അൻവർ. പോലീസ് മേധാവികളുടെ മോശം പെരുമാറ്റം കാലങ്ങളായുള്ളതാണെന്നും മുഖ്യമന്ത്രി പിണറായി വിജയൻ്റെ കാലത്ത് അത് അവസാനിപ്പിക്കണമെന്ന സദുദ്ദേശ്യത്തോടെയാണ് താൻ ചില കാര്യങ്ങൾ വെളിപ്പെടുത്തിയതെന്നും അദ്ദേഹം പറഞ്ഞു.

പിവി അൻവറിന് നിരുപാധിക പിന്തുണ പ്രഖ്യാപിച്ച യു.ഡി.എഫ് കൺവീനർ എം എം ഹസൻ്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം. ‘സംസ്ഥാന പൊലീസിലെ ഉന്നതരുടെ കൊള്ളരുതായ്മകൾ എന്തുവിലകൊടുത്തും തടയണം എന്ന ദൃഢനിശ്ചയക്കാരനാണ് കേരളത്തിന്റെ മുഖ്യമന്ത്രി.

സംസ്ഥാന പൊലീസ് അസോസിയേഷന്റെ സംസ്ഥാന സമ്മേളനം ഉദ്ഘാടനം ചെയ്ത് മുഖ്യമന്ത്രി നടത്തിയ പ്രസംഗത്തിൽ കുറ്റം ചെയ്യുന്ന പൊലീസുകാർക്കെതിരെ, ശബ്ദമുയർത്തി നൽകിയ ശക്തമായ മുന്നറിയിപ്പ് കേട്ടവരെ മുഴുവൻ ആവേശം കൊള്ളിച്ചത് മറക്കാനാവില്ല. പൊലീസ് സേനയിലെ മുടിചൂടാമന്നമാർക്കെതിരെ പരസ്യമായി രംഗത്തുവരാൻ എനിക്ക് ആത്മവിശ്വാസം നൽകിയത് അദ്ദേഹത്തിന്റെ വിട്ടുവീഴ്ചയില്ലാത്ത ഇത്തരം സമീപനങ്ങളാണ്,’ -അൻവർ പറഞ്ഞു. സിപിഎമ്മിൽ നിന്നും മുഖ്യമന്ത്രിയിൽ നിന്നും തന്നെ അകറ്റാമെന്ന് ആരും കിനാവ് കാണേണ്ടെന്നും ഹസന്റെ പിന്തുണ തനിക്ക് വേണ്ടെന്നും അദ്ദേഹം കൂട്ടിച്ചേർത്തു.