കേരളത്തിന് വേണ്ടി പാര്‍ലമെന്റില്‍ കോൺഗ്രസിൽ നിന്നും എന്തെങ്കിലും മിണ്ടിയത് ടി എന്‍ പ്രതാപന് മാത്രമാണ്: മന്ത്രി മുഹമ്മദ് റിയാസ്
സംസ്ഥാനത്തെ ജനങ്ങള്‍ക്കൊപ്പം നിന്ന് ഇടതുമുന്നണി സര്‍ക്കാരിന്റെ നിലപാട് പാര്‍ലമെന്റില്‍ പറഞ്ഞതിനാണോ കോണ്‍ഗ്രസ് ടി എന്‍ പ്രതാപന് ഇത്തവണ ലോക്സഭാ സീറ്റ് നിഷേധിച്ചതെന്ന് മന്ത്രി പി എ മുഹമ്മദ് റിയാസ് . കോഴിക്കോട് നോര്‍ത്ത് മണ്ഡലം കണ്‍വന്‍ഷനില്‍ സംസാരിക്കുകയായിരുന്നു അദ്ദേഹം.
കേന്ദ്രത്തിൽ നിന്നും കേരളത്തിന് അര്‍ഹതപ്പെട്ട പണം ലഭിക്കേണ്ടതിനെ കുറിച്ച് ഒരു കോണ്‍ഗ്രസ് എംപിയും പാര്‍ലമെന്റില്‍ മിണ്ടിയില്ല. ഒരുമിച്ച് നില്‍ക്കേണ്ട സന്ദര്‍ഭത്തില്‍ അവര്‍ സങ്കുചിത രാഷ്ട്രീയ നിലപാട് സ്വീകരിച്ചു. എന്തെങ്കിലും മിണ്ടിയത് തൃശൂര്‍ എംപി ടി എന്‍ പ്രതാപന് മാത്രമാണ്. അദ്ദേഹത്തിന് ഇപ്പോള്‍ സീറ്റുമില്ല.
സംസ്ഥാനത്തിന് അര്‍ഹമായ പണം ലഭിക്കേണ്ടതിനെ കുറിച്ച് എല്‍ഡിഎഫ് ഇവിടെ ക്യാമ്പയിന്‍ ശക്തമാക്കിയ ഘട്ടത്തിലാണ് പ്രതാപന് ഇക്കാര്യം പാര്‍ലമെന്റില്‍ ഉയര്‍ത്തിയത്. കേരളത്തിൽ കോണ്‍ഗ്രസിന്റെ മറ്റ് സിറ്റിംഗ് എംപിമാര്‍ എല്ലാം മത്സരിക്കുമ്പോള്‍ തൃശൂരില്‍ പ്രതാപന് മാത്രം സീറ്റ് നിഷേധിച്ചുവെന്നും മന്ത്രി ആരോപിച്ചു.
