സ്റ്റണ്ടും സെക്‌സും നിറഞ്ഞ ഒരു സിനിമയായി പിണറായി സർക്കാർ മാറിയിരിക്കുന്നു: കെ മുരളീധരൻ
സംസ്ഥാനത്തെ പിണറായി സര്‍ക്കാര്‍ സ്റ്റണ്ടും സെക്‌സും നിറഞ്ഞ ഒരു സിനിമയായി മാറിയിരിക്കുകയാണെന്ന് മുതിര്‍ന്ന കോണ്‍ഗ്രസ് നേതാവും എംപിയുമായ കെ മുരളീധരന്‍. കേരളത്തിൽ കോണ്‍ഗ്രസ് എംഎല്‍എയായ എല്‍ദോസ് കുന്നപ്പിള്ളിക്ക് ഒരു നിയമവും കടകംപള്ളി സുരേന്ദ്രന് മറ്റൊരു നിയമവുമാണെന്നും അദ്ദേഹം വിമര്‍ശിച്ചു.
സ്വപ്നസുരേഷ് ഉയർത്തിയ ആരോപണങ്ങളില്‍ അന്വേഷണം വേണമെന്നും എന്തുകൊണ്ട് കടകംപള്ളിയും ശ്രീരാമകൃഷ്ണനും തോമസ് ഐസക്കും അന്വേഷണം നേരിടുന്നില്ലെന്നും മുരളീധരൻ ചോദിക്കുന്നു. അപ്പോള്‍ ഇതിന് പിന്നില്‍ എന്തോ ഉണ്ട്. സ്വപ്നയ്ക്ക് എതിരെ എന്തുകൊണ്ട് സിപിഎം നേതാക്കള്‍ മാനനഷ്ട കേസ് കൊടുക്കുന്നില്ലെന്നും മുരളീധരന്‍ ചോദിച്ചു.
അതേപോലെ തന്നെ, അഹംഭാവത്തിന് കൈയും കാലുംവെച്ച മേയറാണ് തിരുവനന്തപുരത്തേതെന്നും കെ മുരളീധരന്‍ പറഞ്ഞു. മേയര്‍ക്കെതിരെ പ്രതിഷേധിച്ച യൂത്ത്‌കോണ്‍ഗ്രസുകാരെ ഡിവൈഎഫ്‌ഐക്കാര്‍ പൊലീസിന് മുന്നിലിട്ട് മര്‍ദിക്കുന്നു. ഗുണ്ടകള്‍ക്ക് പൊലീസ് കുടപിടിക്കുകയാണെന്നും അദ്ദേഹം ആരോപിച്ചു.
