പിണറായി വിജയന്‍ ഭരിക്കുമ്പോള്‍ പൊലീസ് സിപിഎമ്മിന്‍റെ അടിമകളായി: വി മുരളീധരൻ
പിണറായി വിജയന്‍ ഭരിക്കുമ്പോള്‍ കേരളാ പൊലീസ് സിപിഎമ്മിന്‍റെ അടിമകളായി എന്ന് ബിജെപി നേതാവും മുന്‍ കേന്ദ്രമന്ത്രിയുമായ വി.മുരളീധരന്‍. സാധാരണ ജനങ്ങളെ സംരക്ഷിക്കേണ്ട പൊലീസുകാർ അക്രമത്തിന് കൂട്ടുനിൽക്കുന്ന സാഹചര്യമാണ് കേരളത്തിൽ ഉള്ളതെന്നും മുൻ കേന്ദ്രമന്ത്രി പറഞ്ഞു.
പോലീസ് സിപിഎം നേതാക്കളുടെ താൽപര്യമനുസരിച്ചാണു പ്രവർത്തിക്കുന്നതെങ്കില്‍ ജനം പൊലീസ് സ്റ്റേഷനിലെത്തി അവരുടെ ഉത്തരവാദിത്തം ഓർമിപ്പിക്കുമെന്നും അദ്ദേഹം പറഞ്ഞു. കിളിമാനൂർ സ്റ്റേഷനിലേക്ക് ബിഎംഎസ് സംഘടിപ്പിച്ച മാർച്ചിൽ പങ്കെടുക്കുകയായിരുന്നു വി.മുരളീധരൻ. മുതിർന്ന ബിജെപി നേതാവ് സി.കെ.പത്മനാഭൻ മാർച്ച് ഉദ്ഘാടനം ചെയ്തു.
സംസ്ഥാനത്തെ ബിജെപി പ്രവര്‍ത്തകരോടും നേതാക്കളോടും അപമര്യാദയായി പെറുമാറുന്നത് പോലീസ് പതിവാക്കിയിരിക്കുന്നു. ജനങ്ങളുടെ ആവശ്യങ്ങളുമായി ചെല്ലുന്ന ജനപ്രതിനിധികളെപ്പോലും അവഹേളിക്കുകയാണെന്ന് മുരളീധരന്‍ കുറ്റപ്പെടുത്തി. കിളിമാനൂരിൽ ബിഎംഎസ് ലോഗോ മാറ്റിയാൽ മാത്രമോ ഓട്ടോ ഓടിക്കാൻ അനുവദിക്കൂ എന്ന പൊലീസ് നിലപാട് ശക്തമായി ചെറുക്കും.
കടമകൾ മറന്നുപോയാൽ ബിജെപി–ബിഎംഎസ് പ്രവര്‍ത്തകര്‍ അത് പൊലീസിനെ ഓര്‍മിപ്പിക്കുമെന്നും മുരളീധരന്‍ മുന്നറിയിപ്പ് നല്‍കി.
