മഹാത്മാഗാന്ധി പരാമർശങ്ങളുടെ പേരിൽ പ്രധാനമന്ത്രി മോദിക്കെതിരെ പോലീസിൽ പരാതി

മഹാത്മാഗാന്ധിയെക്കുറിച്ചുള്ള വിവാദ പരാമർശങ്ങളുടെ പേരിൽ പ്രധാനമന്ത്രി നരേന്ദ്ര മോദിക്കെതിരെ ദേശീയ അവാർഡ് ജേതാവ് ലൂയിറ്റ് കുമാർ ബർമാൻ പോലീസിൽ പരാതി നൽകി. ബുധനാഴ്ച രാത്രി ഗുവാഹത്തിയിലെ ഹതിഗാവ് പോലീസ് സ്‌റ്റേഷനിലാണ് രാഷ്ട്രപിതാവിനെ കുറിച്ച് മോദി വളരെ നിന്ദ്യമായ പ്രസ്താവന നടത്തിയെന്ന് ആരോപിച്ച് ബർമാൻ പരാതി നൽകിയത്.

പരാതിയിൽ പ്രാഥമിക അന്വേഷണം നടക്കുകയാണെന്നും ഇതുവരെ എഫ്ഐആർ രജിസ്റ്റർ ചെയ്തിട്ടില്ലെന്നും പോലീസ് പറഞ്ഞു.“…ലോകമെമ്പാടും, മഹാത്മാഗാന്ധി ഒരു മഹത്തായ വ്യക്തിയായിരുന്നു. ലോകം മുഴുവൻ മഹാത്മാഗാന്ധിയെ അറിയുന്നുവെന്ന് ഉറപ്പാക്കേണ്ടത് ഈ 75 വർഷത്തെ നമ്മുടെ ഉത്തരവാദിത്തമല്ലേ. ഗാന്ധിയെക്കുറിച്ച് ആർക്കും അറിയില്ല എന്നതിൽ ഖേദമുണ്ട്. ആദ്യമായി ‘ഗാന്ധി’ എന്ന സിനിമ ചെയ്തപ്പോൾ, ആരാണ് ഈ വ്യക്തി എന്നറിയാൻ ലോകമെമ്പാടും ആകാംക്ഷയുണ്ടായിരുന്നു. “- ഒരു ടിവി ചാനലിന് നൽകിയ അഭിമുഖത്തിൽ പ്രധാനമന്ത്രി മോദി പറഞ്ഞു.

ഇത് അങ്ങേയറ്റം അപകീർത്തികരമായ പ്രസ്താവനയാണെന്നും ഇന്ത്യയിലെ ഒരു പൗരന് അംഗീകരിക്കാൻ കഴിയില്ലെന്നും ബർമൻ തൻ്റെ പരാതിയിൽ പറഞ്ഞു. ഒരു പൗരനെന്ന നിലയിൽ, മഹാത്മാഗാന്ധിയെ അപമാനിക്കുന്നത് ഞങ്ങൾക്ക് അംഗീകരിക്കാനാവില്ല. അദ്ദേഹത്തെ ലോകത്തിന് പരിചയപ്പെടുത്താൻ ഒരു സിനിമയും ആവശ്യമില്ല, രജത കമലം നേടിയ 2021 ലെ അസമീസ് ചിത്രം ‘ബൂംബാ റൈഡ്’ നിർമ്മിച്ച ബർമാൻ പറഞ്ഞു,

മഹാത്മാഗാന്ധിയെ ഒരു സിനിമയുമായി താരതമ്യപ്പെടുത്തിയതിലൂടെ നരേന്ദ്രമോദി ഇന്ത്യയിലെ ജനങ്ങൾക്കൊപ്പം മഹാത്മാഗാന്ധിയെ അപകീർത്തിപ്പെടുത്തുകയാണ് ചെയ്തത്. അതിനാൽ, നരേന്ദ്ര മോദിക്കെതിരെ നിയമത്തിൻ്റെ പ്രസക്തമായ വകുപ്പ് പ്രകാരം നടപടിയെടുക്കാൻ ഞാൻ നിങ്ങളോട് അഭ്യർത്ഥിക്കുന്നു, ”ബർമാൻ പറഞ്ഞു.