റിക്കി പോണ്ടിംഗ് ഇനി പഞ്ചാബ് കിങ്‌സ് പരിശീലകന്‍; നിയമനം നാല് വർഷത്തേക്ക്
ഐപിഎല്ലില്‍ ഡല്‍ഹി ക്യാപിറ്റല്‍സിന്റെ പരിശീലക സ്ഥാനം ഒഴിഞ്ഞ മുൻ ഓസ്‌ട്രേലിയൻ നായകൻ റിക്കി പോണ്ടിംഗ് ഇനി പഞ്ചാബ് കിങ്‌സ് പരിശീലകനാകും . അടുത്ത നാലു വര്‍ഷത്തേക്കാണ് നിയമനം. ട്രെവര്‍ ബെയ്‌ലിസിന് പകരമാണ് പഞ്ചാബ് ടീം പോണ്ടിങ്ങിനെ പരിശീലകസ്ഥാനത്തേക്ക് എത്തിച്ചത്.
പുതിയ സ്ഥാനത്തിനൊപ്പം ടീമിന്‍റെ മറ്റ് വിഭാഗങ്ങളിലെ പരിശീലകരുടെ കാര്യത്തിലും പോണ്ടിംഗ് തന്നെയായിരിക്കും അന്തിമ തീരുമാനമെടുക്കുക. അവസാന ഏഴു സീസണില്‍ ഡല്‍ഹി ക്യാപിറ്റല്‍സിന്റെ പരിശീലകനായിരുന്നു 49 കാരനായ പോണ്ടിങ്. ഐപിഎല്ലില്‍ ഇതുവരെ കിരീടം നേടാന്‍ പഞ്ചാബിന് സാധിച്ചിട്ടില്ല. താൻ ഈ പുതിയ വെല്ലുവിളിയെ ആവേശത്തോടെ സ്വീകരിക്കുന്നതായി പോണ്ടിങ് പറഞ്ഞു.
ഇനി വരാനിരിക്കുന്ന സീസണ് മുന്നോടിയായി നടക്കുന്ന മെഗാ താരലേലലത്തിന് മുമ്പ് ആരെയൊക്കെ ടീമില്‍ നിലനിര്‍ത്തണമെന്ന കാര്യത്തില്‍ തീരുമാനമെടുക്കുകയായിരിക്കും പോണ്ടിംഗിന് മുന്നിലുള്ള ആദ്യ വെല്ലുവിളി.
