കഠിനാധ്വാനത്തിൻ്റെയും നിശ്ചയദാർഢ്യത്തിൻ്റെയും തെളിവ്; അഫ്ഗാൻ ക്രിക്കറ്റ് ടീമിനെ പ്രശംസിച്ച് സച്ചിൻ

ലോകകപ്പിലെ സൂപ്പർ 8-ഗ്രൂപ്പിൽ ഓസ്‌ട്രേലിയയെയും ബംഗ്ലാദേശിനെയും പരാജയപ്പെടുത്തി തങ്ങളുടെ ആദ്യ ടി20 ലോകകപ്പ് സെമിഫൈനലിലേക്ക് കുതിച്ച അഫ്ഗാനിസ്ഥാൻ ക്രിക്കറ്റ് ടീം ചരിത്രം സൃഷ്ടിച്ചിരിക്കുകയാണ്.

ഇപ്പോഴിതാ, 2024 ടി20 ലോകകപ്പിലെ അഫ്ഗാനിസ്ഥാൻ്റെ മികച്ച പ്രകടനത്തിന് ഇന്ത്യൻ ഇതിഹാസ ക്രിക്കറ്റ് താരം സച്ചിൻ ടെണ്ടുൽക്കർ അഭിനന്ദിക്കുകയും ടൂർണമെൻ്റ് ഫേവറിറ്റുകളായ ഓസ്‌ട്രേലിയയെയും ന്യൂസിലൻഡിനെയും മറികടക്കാൻ ടീം നടത്തിയ കഠിനാധ്വാനത്തെ എടുത്തുപറയുകയും ചെയ്തു.

“അഫ്ഗാനിസ്ഥാൻ, ന്യൂസിലൻഡ്, ഓസ്‌ട്രേലിയ തുടങ്ങിയ ടീമുകളെ മറികടന്ന് സെമിഫൈനലിലേക്കുള്ള നിങ്ങളുടെ വഴി അവിശ്വസനീയമാണ്. ഇന്നത്തെ വിജയം നിങ്ങളുടെ കഠിനാധ്വാനത്തിൻ്റെയും നിശ്ചയദാർഢ്യത്തിൻ്റെയും തെളിവാണ്. നിങ്ങളുടെ പുരോഗതിയിൽ അഭിമാനിക്കുന്നു. തുടരുക” അദ്ദേഹം സോഷ്യൽ മീഡിയയിൽ എഴുതി.