ഹരിയാനയിലെ സ്കൂളുകളിൽ ‘ഗുഡ് മോർണിംഗ്’ന് പകരം ‘ജയ് ഹിന്ദ്’ പറയും; നിർദ്ദേശം നൽകി സ്‌കൂൾ വിദ്യാഭ്യാസ ഡയറക്ടറേറ്റ്
ഹരിയാനയിലുള്ള സ്കൂളുകളിൽ ഇനിമുതൽ രാവിലെ ‘ഗുഡ് മോർണിംഗ്’ന് പകരം ‘ജയ് ഹിന്ദ്’ പറയും. ഇതുമായി ബന്ധപ്പെട്ട് ഹരിയാന സ്‌കൂൾ വിദ്യാഭ്യാസ ഡയറക്ടറേറ്റാണ് നിർദേശം നൽകിയത്. ഈ വരുന്ന സ്വാതന്ത്ര്യ ദിനം മുതൽ തീരുമാനം നടപ്പിലാക്കും.
വിദ്യാർത്ഥികളിൽ രാജ്യസ്‌നേഹവും ദേശീയ ബോധവും വളർത്താൻ ലക്ഷ്യമിട്ടിട്ടുള്ള സർക്കുലർ എല്ലാ ജില്ലാ വിദ്യാഭ്യാസ ഓഫീസർമാർക്കും പ്രിൻസിപ്പൽമാർക്കും പ്രധാന അധ്യാപകർക്കും അയച്ചിട്ടുണ്ട്. സ്വാതന്ത്ര്യ ദിനത്തിൽ ദേശീയ പതാക ഉയർത്തുന്നതിന് മുമ്പ് ‘ജയ് ഹിന്ദ്’ ഉപയോഗിക്കണമെന്ന് സർക്കുലറിൽ പറയുന്നു.
ബ്രിട്ടീഷ് ഭരണത്തിനെതിരെയുള്ള പോരാട്ടത്തിൽ നേതാജി സുഭാഷ് ചന്ദ്രബോസ് ആവിഷ്കരിച്ച ‘ജയ് ഹിന്ദ്’ അതിനുശേഷം ഇന്ത്യയുടെ സായുധ സേന സ്വീകരിച്ചതായി വകുപ്പ് അഭിപ്രായപ്പെട്ടു. മുദ്രാവാക്യം പ്രാദേശികവും സാംസ്കാരികവുമായ വ്യത്യാസങ്ങളെ മറികടന്ന് ഐക്യത്തെ പ്രതീകപ്പെടുത്തുന്നുവെന്നും പറയുന്നു. ഹരിയാനയിൽ 14,300 സർക്കാർ സ്‌കൂളുകളിലായി 23.10 ലക്ഷം വിദ്യാർഥികളുണ്ട്.
ഹരിയാനയിലെ ഏഴായിരത്തോളം സ്വകാര്യ സ്കൂളുകളിൽ സർക്കാർ സ്‌കൂളുകൾക്ക് തുല്യമായ വിദ്യാർത്ഥികളുണ്ടെന്നാണ് അധികൃതരുടെ കണക്ക്. “ ഇപ്പോൾ നൽകിയത് സ്‌കൂളുകളിലെ ദൈനംദിന യോഗ, ക്വിസ് സെഷനുകൾക്കുള്ള നിർദ്ദേശങ്ങൾക്ക് സമാനമായ ഒരു നിർദേശം മാത്രമാണ്. നിർദേശം പാലിച്ചില്ലെങ്കിൽ ശിക്ഷിക്കുന്നതിനുള്ള വ്യവസ്ഥകളൊന്നുമില്ല” വിദ്യാഭ്യാസ വകുപ്പിലെ ഒരു ഉദ്യോഗസ്ഥൻ പറഞ്ഞു.
