മോദിയെപ്പോലുള്ള നേതാക്കളെ അട്ടിമറിക്കാൻ കോടിക്കണക്കിന് രൂപ ചിലവാക്കുന്നു; ജോർജ്ജ് സോറസിനെതിരെ സ്മൃതി ഇറാനി
ഇന്ത്യൻ പ്രധാനമന്ത്രി നരേന്ദ്ര മോദിക്കും വ്യവസായി ഗൗതം അദാനിക്കുമെതിരെ വിമർശനം ഉന്നയിച്ച ശതകോടീശ്വരൻ ജോർജ്ജ് സോറസിനെതിരെ ബിജെപി രംഗത്തെത്തി. ഇന്ത്യയുടെ ജനാധിപത്യ പ്രക്രിയകളിൽ ഇടപെടാൻ ശ്രമിക്കുന്ന വിദേശ ശക്തികൾക്കെതിരെ രാജ്യം ഒറ്റക്കെട്ടായി പ്രതികരിക്കണമെന്ന് കേന്ദ്രമന്ത്രി സ്മൃതി ഇറാനി പറഞ്ഞു.
അദാനിയുടെ വ്യാവസായിക സാമ്രാജ്യത്തിലെ തട്ടിപ്പും ഓഹരി കൃത്രിമവും സംബന്ധിച്ച ആരോപണങ്ങളിൽ വിദേശ നിക്ഷേപകരുടെയും പാർലമെന്റിന്റെയും ചോദ്യങ്ങൾക്ക് പ്രധാനമന്ത്രി ഉത്തരം നൽകേണ്ടിവരുമെന്ന് സോറോസ് വിമർശിച്ചിരുന്നു. ഇതിനെത്തുടർന്നായിരുന്നു കേന്ദ്രമന്ത്രി തന്നെ മറുപടി പറഞ്ഞത്.
എവിടെയും വ്യക്തിപരമായ നേട്ടങ്ങൾക്കായി തന്റെ ആവശ്യങ്ങൾക്ക് വഴങ്ങുന്ന ഒരു സർക്കാരിനെയാണ് ജോർജ്ജ് സോറോസ് ആഗ്രഹിക്കുന്നത്. നരേന്ദ്ര മോദിയെപ്പോലുള്ള നേതാക്കളെ അട്ടിമറിക്കാൻ കോടിക്കണക്കിന് രൂപ ചിലവാക്കുന്നുണ്ടെന്ന് സോറോസിൻ്റെ പ്രസ്താവനകളിൽ നിന്ന് വ്യക്തമാണ്. ഇന്ത്യയുടെ ജനാധിപത്യ താൽപ്പര്യങ്ങളെ ദുർബലപ്പെടുത്താൻ ശ്രമിക്കുന്ന ഇത്തരം വ്യക്തികൾക്കെതിരെ രാജ്യം ഒന്നിച്ച് നിൽക്കണമെന്നും സ്മൃതി ഇറാനി പറഞ്ഞു.
