വനിതാ ടി 20 ലോകകപ്പ്; പാകിസ്ഥാനെതിരായ മത്സരം സ്മൃതി മന്ദാനയ്ക്ക് നഷ്ടമാകാൻ സാധ്യത
സന്നാഹ മത്സരത്തിനിടെ സംഭവിച്ച കൈവിരലിനേറ്റ പരുക്കിൽ നിന്ന് മോചിതയായിട്ടില്ലാത്തതിനാൽ ഞായറാഴ്ച പാക്കിസ്ഥാനെതിരായ ഇന്ത്യയുടെ വനിതാ ടി20 ലോകകപ്പ് ഓപ്പണർ വൈസ് ക്യാപ്റ്റൻ സ്മൃതി മന്ദാനയ്ക്ക് നഷ്ടമായേക്കും. കഴിഞ്ഞ തിങ്കളാഴ്ച ഓസ്‌ട്രേലിയക്കെതിരായ സന്നാഹ മത്സരത്തിനിടെ ഫീൽഡിംഗിനിടെ 26 കാരിയായ ഓപ്പണറുടെ ഇടതു കൈയുടെ നടുവിരലിന് പരിക്കേൽക്കുകയായിരുന്നു.
“പരിശീലന ഗെയിമിൽ സ്മൃതിയ്ക്ക് പരിക്കേറ്റു. ഇതുവരെ ലോകകപ്പിൽ നിന്ന് പുറത്താണെന്ന് പറയാൻ കഴിയില്ല. പക്ഷേ പാകിസ്ഥാൻ കളി നഷ്‌ടമാകുമെന്ന് ഐസിസി വൃത്തങ്ങൾ പറഞ്ഞു. ബുധനാഴ്ച ബംഗ്ലാദേശിനെ 52 റൺസിന് പരാജയപ്പെടുത്തിയപ്പോൾ ഇന്ത്യയുടെ രണ്ടാം സന്നാഹ മത്സരം മന്ദാനയ്ക്ക് നഷ്ടമായി.
ഇതോടൊപ്പം തന്നെ ക്യാപ്റ്റൻ ഹർമൻപ്രീത് കൗറിന്റെ ഫിറ്റ്‌നസും ആശങ്കയിലാണ്. കഴിഞ്ഞയാഴ്ച ദക്ഷിണാഫ്രിക്കയ്‌ക്കെതിരായ ത്രിരാഷ്ട്ര പരമ്പരയുടെ ഫൈനലിനിടെ തോളിന് പരിക്കേറ്റിരുന്നു. വമ്പൻ ഹിറ്റായ മധ്യനിര ബാറ്റർ ഇന്ത്യയുടെ രണ്ട് സന്നാഹ മത്സരങ്ങളിലും ബാറ്റ് ചെയ്തില്ല.
