രാജ്യത്ത് നല്ലതൊന്നും സംഭവിക്കുന്നത് കാണാൻ ചിലർക്ക് താൽപ്പര്യമില്ല: പ്രധാനമന്ത്രി
രാജ്യത്ത് നല്ലതൊന്നും സംഭവിക്കുന്നത് കാണാൻ ചിലർ ആഗ്രഹിക്കുന്നില്ലെന്നും വിവാദങ്ങൾ സൃഷ്ടിക്കാൻ മാത്രമാണ് ചിലർ ഇഷ്ടപ്പെടുന്നതെന്നും പ്രതിപക്ഷ പാർട്ടികൾക്കെതിരായ ആക്രമണത്തിൽ പ്രധാനമന്ത്രി നരേന്ദ്ര മോദി പറഞ്ഞു. രാജസ്ഥാനിലെ നാഥദ്വാര ടൗണിൽ നടന്ന ചടങ്ങിൽ വോട്ട് കൊണ്ട് എല്ലാം അളക്കുന്നവർക്ക് രാജ്യത്തെ മനസ്സിൽ നിർത്തി പദ്ധതികൾ ആസൂത്രണം ചെയ്യാൻ കഴിയില്ലെന്നും അദ്ദേഹം പറഞ്ഞു.
“ഈ ചിന്താഗതി കാരണം, രാജ്യത്ത് അടിസ്ഥാന സൗകര്യ വികസനത്തിന് മുൻഗണന നൽകിയില്ല,” ആരുടെയും പേര് പരാമർശിക്കാതെ അദ്ദേഹം പറഞ്ഞു. സംസ്ഥാന മുഖ്യമന്ത്രി അശോക് ഗെലോട്ടും മറ്റ് സംസ്ഥാന നേതാക്കളും ചടങ്ങിൽ പങ്കെടുത്തു.
മോദിയുടെ പ്രസംഗത്തിന് മുമ്പ്, ദുംഗർപൂർ-രത്‌ലം വഴിയുള്ള ബൻസ്‌വാര റെയിൽ പാത, കരൗലി-സർമാതുര റെയിൽ പാത, കിഴക്കൻ രാജസ്ഥാൻ കനാൽ പദ്ധതിക്ക് ദേശീയ പദ്ധതി പദവി എന്നിവ ഉൾപ്പെടെയുള്ള തീർപ്പാക്കാത്ത പദ്ധതികളിലേക്ക് ഗെഹ്‌ലോട്ട് പ്രധാനമന്ത്രിയുടെ ശ്രദ്ധ ആകർഷിച്ചിരുന്നു.
ജനാധിപത്യത്തിൽ പ്രതിപക്ഷത്തെ ബഹുമാനിക്കണമെന്നും പ്രധാനമന്ത്രി മോദിയും ഈ ദിശയിലേക്ക് നീങ്ങുമെന്നും ഗെലോട്ട് പറഞ്ഞു. ഇത് നടപ്പാക്കിയാൽ ഭരണപക്ഷത്തിനും പ്രതിപക്ഷത്തിനും കൂടുതൽ ഊർജസ്വലതയോടെ രാജ്യത്തെ സേവിക്കാൻ കഴിയുമെന്നും അദ്ദേഹം പറഞ്ഞു.
“രാജ്യത്ത് ചില ആളുകൾ ഇത്തരം വികലമായ ആശയങ്ങളുടെ ഇരകളായി മാറിയിരിക്കുന്നു; അവർ നിഷേധാത്മകത നിറഞ്ഞവരാണ്. രാജ്യത്ത് നല്ലതൊന്നും സംഭവിക്കുന്നത് കാണാൻ അവർ ആഗ്രഹിക്കുന്നില്ല. വിവാദങ്ങൾ സൃഷ്ടിക്കാൻ മാത്രമാണ് അവർ ഇഷ്ടപ്പെടുന്നത്. നിഷേധാത്മകത നിറഞ്ഞവർക്ക് അവരുടെ സ്വാർത്ഥ രാഷ്ട്രീയ ലക്ഷ്യത്തിനപ്പുറം ചിന്തിക്കാനുള്ള കാഴ്ചപ്പാടോ ശേഷിയോ ഇല്ല”- സംസ്ഥാനത്ത് വിവിധ അടിസ്ഥാന സൗകര്യ വികസന പദ്ധതികൾ ഉദ്ഘാടനം ചെയ്ത ശേഷം പരിപാടിയെ അഭിസംബോധന ചെയ്തുകൊണ്ട് മോദി പറഞ്ഞു.
ആവശ്യമായ മെഡിക്കൽ കോളേജുകൾ ഇതിനകം നിർമ്മിച്ചിരുന്നെങ്കിൽ, ഡോക്ടർമാരുടെ ക്ഷാമം ഉണ്ടാകുമായിരുന്നില്ല. എല്ലാ വീട്ടിലും നേരത്തെ വെള്ളം കിട്ടുമായിരുന്നെങ്കിൽ ജൽ ജീവൻ മിഷൻ തുടങ്ങേണ്ടി വരില്ലായിരുന്നുവെന്നും അദ്ദേഹം പറഞ്ഞു. ദീർഘവീക്ഷണത്തോടെ അടിസ്ഥാന സൗകര്യങ്ങൾ ഒരുക്കാത്തതിനാൽ രാജസ്ഥാനും ദുരിതമനുഭവിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു.
