22 കാരനായ മകൻ്റെ ഓൺലൈൻ ചൂതാട്ട കടങ്ങൾ തിരിച്ചടയ്ക്കാനായില്ല;ആന്ധ്രയിൽ മാതാപിതാക്കൾ ആത്മഹത്യ ചെയ്തു

ഓൺലൈൻ ചൂതാട്ടത്തിലൂടെ 22 വയസ്സുള്ള മകൻ വരുത്തിയ കടം വീട്ടാൻ കഴിയാതെ ദമ്പതികൾ ആത്മഹത്യ ചെയ്തുവെന്ന് പോലീസ് . ആന്ധ്രാ പ്രദേശിലെ യു മഹേശ്വര് റെഡ്ഡിയും (45) ഭാര്യയും ചൊവ്വാഴ്ച രാത്രിയാണ് നന്ദ്യാല ജില്ലയിലെ അബ്ദുള്ളപുരം ഗ്രാമത്തിലെ കൃഷിയിടത്തിൽ ജീവിതം അവസാനിപ്പിച്ചത്.

മകൻ വരുത്തിയ കോടിക്കണക്കിന് രൂപയുടെ കടം വീട്ടാൻ കഴിയാതെ വന്നതോടെയാണ് ദമ്പതികൾ കീടനാശിനി ചേർത്ത ശീതളപാനീയം കഴിച്ചതെന്ന് ആത്മകുരു സബ് ഡിവിഷണൽ പൊലീസ് ഓഫീസർ ആർ രാമൻജി നായിക് പറഞ്ഞു. രണ്ട് കോടി രൂപയുടെ കടബാധ്യതകൾ തീർക്കാൻ മഹേശ്വര് റെഡ്ഡി തൻ്റെ അഞ്ച് ഏക്കർ ഭൂമി ഇതിനകം വിറ്റിരുന്നുവെന്ന് പോലീസ് പറഞ്ഞു .

ബാക്കിയുള്ള കടങ്ങൾ തീർക്കാൻ പ്രാദേശിക കോടതിയിൽ എത്തിയ ഒത്തുതീർപ്പ് പ്രകാരം അദ്ദേഹം കുടുംബ വീടും മറ്റ് സ്വത്തുക്കളും വിനിയോഗിച്ചു. കഴിഞ്ഞ ആറ് മാസമായി ദമ്പതികൾ ബന്ധുവിനൊപ്പമാണ് താമസം, മകൻ ഹൈദരാബാദിൽ താമസിക്കുകയായിരുന്നു. കടം കൊടുക്കുന്നവരിൽ നിന്നുള്ള വർദ്ധിച്ചുവരുന്ന സമ്മർദ്ദം ദമ്പതികളെ അങ്ങേയറ്റത്തെ നടപടിയെടുക്കാൻ നിർബന്ധിതരാക്കി, പോലീസ് കൂട്ടിച്ചേർത്തു.