ഖത്തർ ലോകകപ്പ്: ഘാനയുടെ മുന്നിൽ പൊരുതി കീഴടങ്ങി ദക്ഷിണ കൊറിയ

ഖത്തർ ലോകകപ്പിൽ ആദ്യന്തം വാശിയേറിയ മത്സരത്തിൽ പിറന്നത് മറ്റൊരു കാവ്യം. ​ഗ്രൂപ്പ് എച്ചിലെ ഇന്ന് നടന്ന പോരാട്ടത്തിൽ ദക്ഷിണ കൊറിയയെ രണ്ടിനെതിരെ മൂന്ന് ​ഗോളുകൾക്ക് പരാജയപ്പെടുത്തി ഘാന മികച്ച വിജയം സ്വന്തമാക്കി. സാലിസു, കുഡൂസ് എന്നിവരാണ് ഘാനയ്ക്കായി ​ഗോളുകൾ നേടിയത്.

അതേസമയം, ദക്ഷിണ കൊറിയയുടെ രണ്ട് ​ഗോളുകളും വലയിലാക്കിയത് ചോ ​ഗ്യൂ സം​ങ് ആയിരുന്നു. ആദ്യം മുതൽ കളിയിൽ വ്യക്തമായ ആധിപത്യം പുലർത്തിയത് ദക്ഷിണ കൊറിയ ആയിരുന്നു. പക്ഷെ , കളിയുടെ ​ഗതിമാറ്റിയ ആദ്യ ​ഗോൾ 24-ാം മിനിറ്റിൽ പിറന്നു. ​ ജോർദാൻ ആയൂ തൊടുത്ത് വിട്ട പന്ത് ക്ലിയർ ചെയ്യാൻ പ്രതിരോധ സംഘത്തിന് കഴിഞ്ഞില്ല. മുഹമ്മദ് സാലിസുവിന്റെ ഇടംകാലൻ ഷോട്ട് വലയിൽ കയറി.

10 മിനിറ്റിനുള്ളിൽ തന്നെ രണ്ടാമത്തെ ​ഗോൾ നേടിയാണ് ആഫ്രിക്കൻ വീര്യം ചോരില്ലെന്നുള്ള കാര്യം ഏഷ്യൻ ശക്തികളെ ഘാന വീണ്ടും ഓർമ്മിപ്പിച്ചത്. നേരത്തെ നടന്ന മത്സരത്തിൽ മികവ് കാട്ടിയ മുഹമ്മദ് കുഡൂസ് ആണ് ഇത്തവണ ഘാനയ്ക്ക് സന്തോഷം നൽകിയത്. കുടൂസിന്റെ ഹെ‍ഡർ ​ഗോൾ ആ​ദ്യ പകുതിയിൽ ഘാനയ്ക്ക് രണ്ട് ​ഗോൾ ലീഡ് സമ്മാനിച്ചു.

മത്സരത്തിലെ രണ്ടാം പകുതിയിൽ തീവ്ര ആക്രമണം അഴിച്ചു വിടുന്ന ദക്ഷിണ കൊറിയക്ക് മുന്നിൽ ഘാന വിയർത്തു. ഘാനയുടെ താരങ്ങളെ ഞെട്ടിച്ച് മിനിറ്റുകൾക്കുള്ളിൽ രണ്ട് ​ഗോൾ നേടിയാണ് കൊറിയ മത്സരത്തിലേക്ക് ശക്തമായി തിരിച്ച് വന്നത്. ചോ ​ഗ്യൂ സം​ങിന്റെ ഹെഡ്ഡറുകൾക്ക് മുന്നിൽ ഘാന പ്രതിരോധം പൊളിഞ്ഞുവീണു.

58-ാം മിനിറ്റിലാണ് ആദ്യ ​ഗോൾ വന്നത്. ബെഞ്ചിൽ നിന്ന് കളത്തിലെത്തി, അധികം നേരം കഴിയും മുമ്പ് തന്നെ ലീ കാം​ഗ് ഇൻ ഇടതു വിം​ഗിൽ നിന്ന് നൽകിയ കിടിലൻ ക്രോസിൽ ഡൈവിം​ഗ് ഹെഡ്ഡറിലൂടെയാണ് സം​ങ് കൊറിയയുടെ ഹീറോ ആയത്.