അത് തമാശ; വേലുപ്പിള്ള പ്രഭാകരൻ ജീവിച്ചിരിപ്പുണ്ടെന്ന അവകാശവാദം തള്ളി ശ്രീലങ്ക

2009-ൽ ശ്രീലങ്കൻ സൈന്യം കൊലപ്പെടുത്തിയ എൽ.ടി.ടി.ഇ തലവൻ വേലുപ്പിള്ള പ്രഭാകരൻ ഇപ്പോഴും ജീവിച്ചിരിപ്പുണ്ടെന്ന തമിഴ് ദേശീയ നേതാവിന്റെ വാദം “തമാശ” എന്ന നിലയിൽ ശ്രീലങ്ക തള്ളിക്കളഞ്ഞു.

“ലിബറേഷൻ ടൈഗേഴ്‌സ് ഓഫ് തമിഴ് ഈഴം (എൽടിടിഇ) നേതാവ് “നന്നായി പ്രവർത്തിക്കുന്നു. അദ്ദേഹത്തിന് ഇപ്പോൾ പ്രത്യക്ഷപ്പെടാൻ അനുകൂലമായ അന്തരീക്ഷം നിലനിൽക്കുന്നു.”- എന്ന് ഇന്ന് തമിഴ്‌നാട്ടിലെ പ്രമുഖ ദേശീയ നേതാവായ പഴ നെടുമാരൻ തഞ്ചാവൂരിൽ മാധ്യമപ്രവർത്തകരോട് പറഞ്ഞിരുന്നു. എന്നാൽ ശ്രീലങ്കൻ പ്രതിരോധ മന്ത്രാലയം നെടുമാരന്റെ അവകാശവാദം തമാശയായി തള്ളിക്കളഞ്ഞു.

“2009 മെയ് 19 നാണ് അദ്ദേഹം കൊല്ലപ്പെട്ടതെന്ന് സ്ഥിരീകരിച്ചു. ഡിഎൻഎ അത് തെളിയിച്ചിട്ടുണ്ട്,” ശ്രീലങ്കയുടെ പ്രതിരോധ മന്ത്രാലയ വക്താവ് കേണൽ നളിൻ ഹെറാത്ത് പിടിഐയോട് പറഞ്ഞു.

അതേസമയം, 1983-ൽ ആരംഭിച്ച കഠിനമായ പോരാട്ടത്തിൽ, ശ്രീലങ്കൻ സൈന്യം 2009 മെയ് മാസത്തിൽ എൽ.ടി.ടി.ഇയുടെ നേതാക്കളെ വധിച്ചുകൊണ്ട് മൂന്ന് പതിറ്റാണ്ടോളം നീണ്ട ക്രൂരമായ ആഭ്യന്തരയുദ്ധം അവസാനിപ്പിച്ചിരുന്നു.

ശ്രീലങ്കൻ സൈന്യം പ്രഭാകരനെ വധിച്ച കൃത്യമായ തീയതി അറിവായിട്ടില്ലെങ്കിലും, 2009 മെയ് 19 നാണ് അദ്ദേഹത്തിന്റെ മരണം പ്രഖ്യാപിച്ചത്.