കങ്കണയ്ക്ക് മറുപടിയുമായി സുഭാഷ് ചന്ദ്രബോസിൻ്റെ ചെറുമകൻ
പ്രശസ്ത അഭിനേതാവും ബിജെപി സ്ഥാനാർത്ഥിയുമായ കങ്കണ റണാവത്തിൻ്റെ “ഇന്ത്യയുടെ ആദ്യ പ്രധാനമന്ത്രി നേതാജി” ആണെന്ന പരാമർശത്തെ വിമർശിച്ച് നേതാജി സുഭാഷ് ചന്ദ്രബോസിൻ്റെ കുടുംബം രംഗത്ത്. സോഷ്യൽ മീഡിയയായ എക്‌സിലെ ഒരു പോസ്റ്റിലെ ഒരു വാർത്താ ലേഖനം പങ്കിട്ടുകൊണ്ട് സുഭാഷ് ചന്ദ്രബോസിൻ്റെ ചെറുമകൻ ചന്ദ്ര കുമാർ ബോസ് “ആരും തങ്ങളുടെ രാഷ്ട്രീയ മോഹത്തിനായി ചരിത്രത്തെ വളച്ചൊടിക്കരുത്.” എന്ന് പറഞ്ഞു,
“നേതാജി സുഭാഷ് ചന്ദ്രബോസ് ഒരു രാഷ്ട്രീയ ചിന്തകനും സൈനികനും രാഷ്ട്രതന്ത്രജ്ഞനും ദർശകനുമായിരുന്നു. ഇന്ത്യയുടെ സ്വാതന്ത്ര്യത്തിനുവേണ്ടി പോരാടുന്നതിന് എല്ലാ സമുദായങ്ങളെയും ഭാരതീയരായി ഒന്നിപ്പിക്കാൻ കഴിയുന്ന ഒരേയൊരു നേതാവ്.
ആ നേതാവിനോടുള്ള യഥാർത്ഥ ആദരവ് അദ്ദേഹത്തിൻ്റെ പ്രത്യയശാസ്ത്രം എല്ലാവരെയും ഉൾക്കൊള്ളുക എന്നതാണ്.” ചന്ദ്രകുമാർ ബോസ് തന്റെ പോസ്റ്റിൽ പറഞ്ഞു.
അതേസമയം തൻ്റെ തത്ത്വങ്ങൾ പാർട്ടിയുമായി യോജിക്കുന്നില്ലെന്ന് പറഞ്ഞ് കഴിഞ്ഞ വർഷം സെപ്റ്റംബറിൽ ചന്ദ്രകുമാർ ബോസ് ബിജെപിയിൽ നിന്ന് രാജിവെച്ചത് ശ്രദ്ധേയമാണ്. ലോക്സഭാ തെരഞ്ഞെടുപ്പിൽ ഹിമാചൽ പ്രദേശിലെ മാണ്ഡിയിൽ നിന്നുള്ള ബിജെപിയുടെ ലോക്സഭാ സ്ഥാനാർത്ഥിയായ കങ്കണ റണാവത്ത് നേതാജിയെക്കുറിച്ചുള്ള തൻ്റെ പരാമർശത്തിൽ സോഷ്യൽ മീഡിയയിൽ ശ്രദ്ധേയമായതിന് പിന്നാലെയാണ് അദ്ദേഹത്തിൻ്റെ പരാമർശം.
