പാക്കിസ്ഥാനിൽ ചാവേർ ബോംബാക്രമണം; 8 പേർ കൊല്ലപ്പെട്ടു
പടിഞ്ഞാറൻ പാകിസ്ഥാനിലെ ചെക്ക് പോയിൻ്റിൽ ഒരു ചാവേർ ബോംബ് പൊട്ടിത്തെറിച്ചു. സംഭവത്തിൽ എട്ട് പേർ കൊല്ലപ്പെടുകയും അഞ്ച് പേർക്ക് പരിക്കേൽക്കുകയും ചെയ്തതായി അധികൃതർ അറിയിച്ചു. ഖൈബർ പഖ്തൂൺഖ്‌വ പ്രവിശ്യയിലെ മിർ അലി പട്ടണത്തിന് സമീപം ഒരു മോട്ടോർബൈക്ക് റിക്ഷയുടെ പിന്നിൽ നിന്നാണ് സ്‌ഫോടനം നടത്തിയതെന്ന് പേര് വെളിപ്പെടുത്താത്ത ഒരു പ്രാദേശിക പോലീസ് ഉദ്യോഗസ്ഥൻ വാർത്താ ഏജൻസിയായ എഎഫ്‌പിയോട് പറഞ്ഞു.
അഫ്ഗാനിസ്ഥാൻ അതിർത്തിക്കടുത്തുള്ള ആക്രമണത്തിൽ സംസ്ഥാന അർദ്ധസൈനിക വിഭാഗത്തിലെ രണ്ട് അംഗങ്ങളും രണ്ട് സാധാരണക്കാരും കൂടാതെ നാല് പോലീസ് ഉദ്യോഗസ്ഥരും കൊല്ലപ്പെട്ടു, അദ്ദേഹം പറഞ്ഞു.
2021-ൽ അഫ്ഗാൻ താലിബാൻ അധികാരത്തിൽ തിരിച്ചെത്തിയതിനുശേഷം പാക്കിസ്ഥാനിൽ തീവ്രവാദം വർധിച്ചു. ശത്രുതാപരമായ ഗ്രൂപ്പുകൾ ഇപ്പോൾ അഫ്‌ഗാനെ അഭയത്തിനായി ഉപയോഗിക്കുന്നുണ്ടെന്ന് പാകിസ്ഥാൻ അവകാശപ്പെട്ടു.
പരിക്കേറ്റ അഞ്ച് ഉദ്യോഗസ്ഥരിൽ മൂന്ന് പേരുടെ നില ഗുരുതരമാണ്, അവരെ പ്രാദേശിക സൈനിക ആശുപത്രിയിലേക്ക് മാറ്റിയതായി പോലീസ് ഓഫീസർ പറഞ്ഞു. പേര് വെളിപ്പെടുത്താൻ ആഗ്രഹിക്കാത്ത ഒരു പ്രാദേശിക സർക്കാർ ഉദ്യോഗസ്ഥൻ മരിച്ചവരുടെയും പരിക്കേറ്റവരുടെയും അതേ എണ്ണം സ്ഥിരീകരിച്ചു.
“അസ്വാദ് ഉൾ-ഹർബ്” എന്ന് സ്വയം വിളിക്കുന്ന അധികം അറിയപ്പെടാത്ത ഒരു തീവ്രവാദ സംഘടനയാണ് ആക്രമണ ഉത്തരവാദിത്വം അവകാശപ്പെട്ടത്. അഫ്ഗാൻ അതിർത്തിക്കടുത്തുള്ള മറ്റൊരു ചെക്ക്‌പോസ്റ്റിൽ പാകിസ്ഥാൻ താലിബാൻ ഈ ആഴ്ച നടത്തിയ റെയ്ഡിൽ 10 പോലീസ് ഉദ്യോഗസ്ഥരെ കൊലപ്പെടുത്തിയിരുന്നു .
പാകിസ്ഥാൻ ഇൻസ്റ്റിറ്റ്യൂട്ട് ഫോർ കോൺഫ്ലിക്റ്റ് ആൻഡ് സെക്യൂരിറ്റി സ്റ്റഡീസിൻ്റെ കണക്കുകൾ പ്രകാരം 2014 ന് ശേഷമുള്ള ഏറ്റവും കൂടുതൽ ചാവേർ ആക്രമണങ്ങളാണ് കഴിഞ്ഞ വർഷം രാജ്യം കണ്ടത്. 29 ചാവേർ ആക്രമണങ്ങൾ രജിസ്റ്റർ ചെയ്യപ്പെട്ടു, ഒരു ദശാബ്ദത്തിനിടയിലെ ഏറ്റവും മാരകമായ വർഷത്തിൽ 329 പേർ കൊല്ലപ്പെട്ടു.
