മണിപ്പൂർ കലാപം: ദുരിതാശ്വാസ പുനരധിവാസം പരിശോധിക്കാൻ സുപ്രീം കോടതി സമിതിയെ നിയോഗിച്ചു
മണിപ്പൂർ വംശീയ അക്രമങ്ങളിലെ ദുരിതബാധിതരുടെ ദുരിതാശ്വാസവും പുനരധിവാസവും പരിശോധിക്കാൻ മൂന്ന് മുൻ വനിതാ ഹൈക്കോടതി ജഡ്ജിമാരുടെ ഒരു കമ്മിറ്റി രൂപീകരിക്കുമെന്ന് സുപ്രീം കോടതി പ്രഖ്യാപിച്ചു.
ജമ്മു കശ്മീർ ഹൈക്കോടതി മുൻ ചീഫ് ജസ്റ്റിസ് ഗീതാ മിത്തൽ അധ്യക്ഷയായ കമ്മിറ്റിയിൽ ജസ്റ്റിസുമാരായ (റിട്ട) ശാലിനി പി ജോഷി, ആഷാ മേനോൻ എന്നിവരും ഉൾപ്പെടുമെന്ന് ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ മൂന്നംഗ ബെഞ്ച് പറഞ്ഞു. സംസ്ഥാനത്തെ അക്രമക്കേസുകളുടെ അന്വേഷണത്തിന് മേൽനോട്ടം വഹിക്കാനും അന്വേഷണം ശരിയായ രീതിയിൽ നടക്കുന്നുണ്ടെന്ന് ഉറപ്പാക്കാൻ റിപ്പോർട്ട് സമർപ്പിക്കാനും മഹാരാഷ്ട്ര മുൻ ഡിജിപി ദത്താത്രയ് പദ്‌സൽഗിക്കറെയും സുപ്രീം കോടതി നിയോഗിച്ചു.
സി.ബി.ഐ അന്വേഷിക്കുന്ന സ്ത്രീകൾക്കെതിരായ കുറ്റകൃത്യങ്ങൾക്ക് വിവിധ സംസ്ഥാനങ്ങളിൽ നിന്നുള്ള അഞ്ച് ഡിവൈഎസ്പി/എസ്പി റാങ്കിലുള്ള ഉദ്യോഗസ്ഥരെ നിയോഗിക്കുമെന്ന് ബെഞ്ച് അറിയിച്ചു. സംസ്ഥാന നിയമിത എസ്‌ഐടികൾ അന്വേഷിക്കുന്ന കേസുകളുടെ മേൽനോട്ടം വഹിക്കാൻ മണിപ്പൂരിന് പുറത്തുള്ള എസ്പി റാങ്കിൽ കുറയാത്ത ഉദ്യോഗസ്ഥരെ നിയോഗിക്കും.
ഔപചാരിക ഉത്തരവ് ഇന്ന് വൈകുന്നേരത്തോടെ വെബ്‌സൈറ്റിൽ അപ്‌ലോഡ് ചെയ്യുമെന്ന് ജസ്റ്റിസ് ജെ ബി പർദിവാല, ജസ്റ്റിസ് മനോജ് മിശ്ര എന്നിവരും ഉൾപ്പെട്ട ബെഞ്ച് അറിയിച്ചു. സിബിഐക്ക് കൈമാറാത്ത കേസുകൾ പരിശോധിക്കാൻ 42 എസ്ഐടികളുണ്ടാകും. ഈ എസ്ഐടികളെല്ലാം മണിപ്പൂരിന് പുറത്തുള്ള ഡിഐജി റാങ്കിലുള്ള ഉദ്യോഗസ്ഥരുടെ മേൽനോട്ടത്തിലായിരിക്കും. അന്വേഷണം കൃത്യമായി നടക്കുന്നുണ്ടെന്ന് ഉറപ്പാക്കാൻ ഓരോ ഉദ്യോഗസ്ഥനും ആറ് എസ്ഐടികളെ നിരീക്ഷിക്കും.
അതേസമയം, സുപ്രീം കോടതിയുടെ നിർദേശപ്രകാരം മണിപ്പൂർ ഡിജിപി രാജീവ് സിംഗ് കോടതിയിൽ ഹാജരായി. കൂടാതെ, വാദം കേൾക്കുമ്പോൾ സംസ്ഥാന ചീഫ് സെക്രട്ടറിയും ഹാജരായിരുന്നുവെന്ന് സോളിസിറ്റർ ജനറൽ തുഷാർ മേത്ത ബെഞ്ചിനെ അറിയിച്ചു.
