തിരുപ്പതി ലഡ്ഡു വിവാദം; പ്രത്യേക അന്വേഷണം ആവശ്യപ്പെട്ട് സുപ്രീം കോടതിയിൽ ഹർജി
തിരുപ്പതി ക്ഷേത്രത്തിലെ ലഡ്ഡുവിൽ മൃഗക്കൊഴുപ്പ് ഉപയോഗിച്ചെന്ന ആരോപണത്തിൽ പ്രത്യേക അന്വേഷണ സംഘം (എസ്ഐടി) അന്വേഷണം ആവശ്യപ്പെട്ട് സുപ്രീം കോടതിയിൽ പൊതുതാത്പര്യ ഹർജി.
തിരുമല തിരുപ്പതി ദേവസ്ഥാനം (ടിടിഡി) ശ്രീ വെങ്കിടേശ്വര സ്വാമി ക്ഷേത്രത്തിൽ ഭക്തർക്ക് നെയ്യിന് പകരം മൃഗക്കൊഴുപ്പ് ഉപയോഗിച്ചാണ് ‘ ലഡ്ഡു പ്രസാദം ’ വിളമ്പുന്നത് എന്നാണ് കർഷകനും ഹിന്ദുസേനാ പ്രസിഡൻ്റുമായ സുർജിത് സിംഗ് യാദവ് സമർപ്പിച്ച ഹർജിയിൽ വാദിച്ചത്.
ക്ഷേത്രത്തിലെ “ലഡ്ഡു പ്രസാദം” തയ്യാറാക്കാൻ മൃഗക്കൊഴുപ്പ് ഉപയോഗിച്ചെന്ന ആരോപണം ഹിന്ദു സമൂഹത്തിൻ്റെ മനസാക്ഷിയെ ഉലച്ചെന്നും അതിലെ അംഗങ്ങളുടെ മതവികാരങ്ങളെയും വികാരങ്ങളെയും ചൊടിപ്പിച്ചതായും ഹർജിയിൽ പറയുന്നു. ആന്ധ്രാപ്രദേശിലെ തിരുപ്പതിയിലുള്ള ശ്രീ വെങ്കിടേശ്വര ക്ഷേത്രത്തിൻ്റെ ഔദ്യോഗിക സംരക്ഷകനാണ് ടിടിഡി.
ജഗൻ മോഹൻ റെഡ്ഡിയുടെ നേതൃത്വത്തിലുള്ള മുൻ സർക്കാരിൻ്റെ കാലത്ത് തിരുപ്പതി ലഡ്ഡു തയ്യാറാക്കാൻ മൃഗക്കൊഴുപ്പ് ഉപയോഗിച്ചുവെന്ന ആന്ധ്രാപ്രദേശ് മുഖ്യമന്ത്രി എൻ ചന്ദ്രബാബു നായിഡുവിൻ്റെ അവകാശവാദം വലിയ രാഷ്ട്രീയ വിവാദത്തിന് കാരണമായിരുന്നു.
