ഇന്ന് രാത്രി എട്ട് മണി മുതല് താമരശ്ശേരി ചുരം വഴിയുള്ള ഗതാഗതത്തിന് നിയന്ത്രണം
![single-img](https://www.evartha.in/wp-content/themes/nextline_evartha_v2/images/footer_logo.png)
![](https://www.evartha.in/wp-content/uploads/2022/12/n45440966616716797703087d71f73ebaa5faf3b148ba83cb83fdb6bf017ed8511f2b9d2b526b493ab3694f.jpg)
വയനാട് : കര്ണാടകത്തിലേക്കുള്ള കൂറ്റന് ട്രക്കുകള്ക്ക് താമരശ്ശേരി ചുരം വഴി പോകാന് അനുമതി നല്കിയതിനാല് ഇന്ന് രാത്രി എട്ട് മണി മുതല് ചുരം വഴിയുള്ള ഗതാഗതത്തിന് നിയന്ത്രണം.
രാത്രി 11 മണിക്കും രാവിലെ അഞ്ചുമണിക്ക് ഇടയിലാണ് ട്രക്കിന് വേണ്ടി ചുരം പൂര്ണമായും ഒഴിച്ചിടുന്നത്. പൊതുജനങ്ങള് ഈ സമയം ഇതുവഴിയുള്ള യാത്രയ്ക്ക് ബദല് മാര്ഗം ഉപയോഗിക്കണമെന്ന് ജില്ലാ കലക്ടര് അറിയിച്ചു.
കര്ണാടകയിലെ നഞ്ചങ്കോടുള്ള ഫാക്ടറിയിലേക്കുള്ള മെഷീനുകളുമായി എത്തിയ 2 ട്രെയ്ലറുകളാണ് ഇന്ന് യാത്ര തുടങ്ങുന്നത്. 16 അടിയോളം വീതിയിലും ഇരുപത് അടിയോളം ഉയരത്തിലുമുള്ള മെഷീനുകളാണ് ലോറിയിലുള്ളത്. ചുരം കയറിയാല് ഗതാഗതം പൂര്ണ്ണമായും തടസ്സപ്പെടുമെന്നതിനാലാണ് നേരത്തെ അനുമതി നല്കാതിരുന്നത്. ട്രെയ്ലറുകള് രണ്ടര മാസത്തോളമായി അടിവാരത്ത് നിര്ത്തിയിട്ടിരിക്കുകയാണ്. പൊലീസ്, അഗ്നി രക്ഷ സേന എന്നിവരുടെ സഹായത്തോടെയാണ് ട്രെയിലറുകളെ ചുരം കടത്തുക.
1. സുല്ത്താന് ബത്തേരി ഭാഗത്ത് നിന്നും കല്പ്പറ്റ-വൈത്തിരി വഴി കോഴിക്കോട് ഭാഗത്തേക്ക് പോകുന്ന ചരക്ക് ലോറികളും ഹെവി വാഹനങ്ങളും നാളെ (വ്യാഴം) രാത്രി 8 മണി മുതല് ബീനച്ചി- പനമരം വഴിയോ, മീനങ്ങാടി -പച്ചിലക്കാട് വഴിയോ പക്രതളം ചുരം വഴിയോ പോകേണ്ടതാണ്. മാനന്തവാടിയില് നിന്നുള്ള വാഹനങ്ങളും ഇപ്രകാരം പോകേണ്ടതാണ്.
2. സുല്ത്താന് ബത്തേരി, മാനന്തവാടി ഭാഗത്ത് നിന്നും കോഴിക്കോട് ഭാഗത്തേക്ക് പോകുന്ന കെഎസ്ആര്ടിസി, സ്വകാര്യ ബസ്സുകള് രാത്രി 9 മണിക്ക് ശേഷം കല്പ്പറ്റയില് നിന്നും പടിഞ്ഞാറത്തറ വഴി പക്രതളം ചുരത്തിലൂടെ പോകേണ്ടതാണ്.
3. ബത്തേരി, കല്പ്പറ്റ ഭാഗങ്ങളില് നിന്നും തൃശ്ശൂര്, മലപ്പുറം ഭാഗങ്ങളിലേക്ക് പോകുന്ന വാഹനങ്ങള് തമിഴ്നാട് നാടുകാണി ചുരം വഴി പോകേണ്ടതാണ്.
4. രാത്രി 9 മണിക്ക് ശേഷം കല്പ്പറ്റ, മേപ്പാടി, പടിഞ്ഞാറത്തറ ഭാഗങ്ങളില് നിന്നും വൈത്തിരി വഴി കോഴിക്കോട് ഭാഗത്തേക്ക് ആംബുലന്സ് ഒഴികെ മറ്റൊരു വാഹനവും പോകാന് അനുവദിക്കില്ല.